AQSHning S+N Associates Ins. kompaniyasi Toshkent viloyatining Nurafshon shahrida 1600 gektar yer maydonida “Aqlli shahar” texnologiyasi asosida shahar barpo etish bo‘yicha o‘z loyihalarini taqdim etdi. Bu haqda Toshkent viloyati hokimligi ma’lum qildi.
Xabarda aytilishicha, viloyat hokimi Zoir Mirzayev AQSHning S+N Associates Ins. kompaniyasi direktori Ronald Djeyms Xabbard boshchiligidagi delegatsiyani qabul qilgan.
40 yildan ziyod vaqt mobaynida dunyoning nufuzli davlatlarida yangi aeroport, mehmonxonalar, universitet, sotuv va xizmat ko‘rsatish obyektlari, shuningdek, yangi shaharlar qurish ishlari bilan shug‘ullanib kelayotgan mazkur yirik kompaniya Nurafshonda 1600 gektar yer maydonida “Aqlli shahar” texnologiyasi asosida shahar barpo etish bo‘yicha o‘z loyihalarini taqdim etdi.
10-15 milliard dollarlik mazkur loyihaga qo‘shimcha 15 dan ortiq yirik investorlar jalb qilinishi, dastlab, mahalliy mahsulotlardan arzon va sifatli qurilish materiallari ishlab chiqariladigan zavod tashkil etish takliflari muhokama qilindi, deyiladi hokimlik axborotida.
Qo‘shimcha qilinishicha, “Aqlli shahar”da davlat korxonasi va tashkilotlari, tibbiyot, ta’lim muassasalari joy oladi. Shuningdek, sanoat zonalari, texnoparklar joylashtiriladi.
S+N Associates Ins. kompaniyasi shubhalimi?
Bloger Nikita Makarenkoning yozishicha S+N Associates, Ins. Kompaniyasining sayti 2015-yildan buyon yangilanmagan. Kompaniya ilgari amalga oshirgan loyihalar nazar solinsa, bolalar maydonchasi, asfalt yotqizish va yo‘l qurish bilan shug‘ullangani ko‘rinadi.
Qiziq jihati kompaniya saytida 3,5 million dollardan ortiq loyihalarni ishlab chiqishga qodir emasligi to‘g‘risida yozilgan. Ammo ular Nurafshonda 10-15 milliard dollarlik loyihani amalga oshirmoqchi.
Holat yuzasidan mas’ullardan izoh kutamiz.
Izoh (0)