Andijon va Farg‘ona viloyatlarida avtokredit evaziga xarid qilingan avtomashinalarni sotib yuborish holatlari aniqlandi. Bu haqda Bosh prokuratura huzuridagi departament xabar berdi.
Qayd etilishicha, departamentning Andijon shahar bo‘limi tomonidan tergovga qadar tekshiruv o‘tkazilgan. Tekshiruvda fuqaro S.K. hududiy tijorat banki filialidan ajratilgan kredit evaziga sotib olingan Chevrolet Equinox rusumli avtomashinani garovga qo‘ymasdan, fuqaro J.Q.ga 38,5 ming dollarga sotib yuborib, bank manfaatlariga 378 million so‘m zarar yetkazgani aniqlangan.
Shu kabi, departamentning Qo‘qon shahar bo‘limi tomonidan o‘tkazilgan tergovga qadar tekshiruvda X.A. ismli shaxs va boshqalar fuqaro SH.Y.ning ishonchiga kirib, uning nomiga tijorat banki Qo‘qon filialidan avtokredit ajratilishiga erishib, ushbu kredit evaziga sotib olingan Equinox rusumli avtomashinani boshqa shaxslarga naqd pulga sotib yuborgan va 326,7 million so‘mni firibgarlik yo‘li bilan qo‘lga kiritgani aniqlangan.
Mazkur holatlar yuzasidan Jinoyat kodeksining 168-moddasi (firibgarlik) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Surxondaryoda xususiy bog‘cha qurish uchun ajratilgan 356 mln so‘m kredit mablag‘lari talon-toroj qilingani to‘g‘risida xabar berilgandi. Shuningdek, Sirdaryoda 10 mlrd so‘m kredit mablag‘ini o‘zlashtirgan MCHJ aniqlangan edi.
Izoh (0)