Markaziy bank boshqaruvining “To‘lov tizimi operatorlari va to‘lov tashkilotlari faoliyatini litsenziyalash tartibi to‘g‘risidagi nizomga o‘zgartirish va qo‘shimchalar kiritish haqida”gi qarori qabul qilindi.
Kiritilgan o‘zgartirishga ko‘ra, xalqaro moliya institutlari, chet el to‘lov tizimi operatorlari, to‘lov tashkilotlari va boshqa kredit tashkilotlari hisoblanmaydigan norezident yuridik shaxslar hamda norezident jismoniy shaxslarning to‘lov tizimi operatorlari va to‘lov tashkiloti ustav fondidagi (ustav kapitalidagi) jami ulushi 50 foizdan oshmasligi kerak.
Ushbu nizom maqsadlarida boshqa kredit tashkilotlari deganda quyidagilar tushuniladi:
- moliyaviy faoliyat turlarini amalga oshiruvchi kompaniyalarni boshqarish maqsadida tashkil etilgan xolding kompaniyasi (boshqaruv kompaniyasi);
- vakolatli davlat organining litsenziyasi (ruxsatnomasi) asosida moliyaviy faoliyat turlaridan birini amalga oshiruvchi va joylashgan (ro‘yxatga olingan) davlatida konsolidatsiyalashgan nazorat mavjud bo‘lgan yuridik shaxslar.
Shuningdek, nizom maqsadlarida quyidagi faoliyat turlari moliyaviy faoliyat turlari hisoblanadi:
- bank faoliyati;
- mikromoliyalash faoliyati;
- sug‘urta faoliyati;
- lizing faoliyati;
- ipotekani qayta moliyalash faoliyatini amalga oshirish.
Xalqaro moliya insitutlari, chet el to‘lov tizimi operatorlari, to‘lov tashkilotlari va boshqa kredit tashkilotlari hisoblanuvchi norezident yuridik shaxslar O‘zbekistonda to‘lov tizimi operatori yoki to‘lov tashkiloti ustav fondining (ustav kapitalining) 50 foizdan ortiq ulushiga ega bo‘lishi uchun ushbu tashkilotlarning ustav fondi 20 million yevro ekvivalentidan kam bo‘lmasligi kerakligi belgilandi.
Eslatib o‘tamiz, 2023-yil sentyabr boshida O‘zbekiston Markaziy banki ijtimoiy tarmoqlarda to‘lov tashkilotlari uchun transchegaraviy pul o‘tkazmalariga doir o‘rnatilayotgan cheklovlar yuzasidan tarqatilayotgan xabarlarga munosabat bildirgandi.
Izoh (0)