Qoraqalpog‘iston Respublikasi, Toshkent va Samarqand viloyatlarida kredit mablag‘larini talon-toroj qilgan MCHJlar aniqlandi. Bu haqda Bosh prokuratura huzuridagi departament xabar berdi.
Qayd etilishicha, departamentning Beruniy tuman bo‘limi tomonidan tergovga qadar tekshiruv o‘tkazilgan. Tekshiruvda “A.A.” MCHJ masʼul shaxslari va boshqalar ishlab chiqarish sexi binosini soxta hujjatlar bilan garovga qo‘yib, naslli chorva mollarini olib kelish maqsadida tijorat banki filialidan ajratilgan 666,6 million so‘m kreditni o‘zlashtirish yo‘li bilan talon-toroj qilgani aniqlangan.
Shu kabi, departamentning Yangiyo‘l shahar bo‘limi tomonidan o‘tkazilgan tergovga qadar tekshiruvda “C.I.” MCHJ rahbari M.D. va boshqalar o‘zaro til biriktirib, 24 nafar fuqaroga 12 oy davomida bo‘lib-bo‘lib to‘lash sharti bilan maishiy texnika xarid qilish uchun onlayn shartnomalar tuzish orqali ularning nomiga plastik kartalar ochib, ushbu plastik kartalarga tushgan jami 531,2 million so‘m kredit mablag‘ini naqdlashtirib olib, talon-toroj qilgani ma’lum bo‘lgan.
Departamentning Samarqand shahar bo‘limi tomonidan o‘tkazilgan tergovga qadar tekshiruvda “F.B.”, “I.Z.”, “A.A.”, “M.f.” va “S.A.” korxonasi masʼul shaxslari va boshqalar ajratilgan kredit mablag‘i evaziga xarid qilgan tikuv mashinalari va ishlab chiqarish jihozlarini sotib yuborib, 257,6 million so‘m kreditni o‘zlashtirish yo‘li bilan talon-toroj qilganliklari hamda bankning qatʼiy hisobidagi kredit rasmiy hujjatlarini qasddan nobud qilgani aniqlangan.
Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Surxondaryoda xususiy bog‘cha qurish uchun ajratilgan 356 mln so‘m kredit mablag‘i talon-toroj qilingani to‘g‘risida xabar berilgandi. Shuningdek, Toshkent viloyatida fermer xo‘jaligi 3,1 mlrd so‘m imtiyozli kredit mablag‘ini o‘zlashtirgani ma’lum bo‘lgan edi.
Izoh (0)