Eronning yaqinda saylangan prezidenti Masʼud Pezeshkiyon Livanning “Hizbulloh” guruhini qo‘llashga vaʼda berdi. Bu haqda rahbarning davlat televideniyesiga bergan intervyusiga asoslanib, Al Arabiya nashri xabar berdi.
Manbada aytilishicha, vazifaga kirishganiga ko‘p bo‘lmagan Pezeshkiyon “Hizbulloh” rahbari Hasan Nasrullohga xat yo‘llagan. Unda Eron guruhni qo‘llashni davom ettirishi, Yaqin Sharqda tinchlikka erishish uchun katta saʼy-harakatlar qilinishi aytilgan.
Eronning “Hizbulloh” guruhini va mintaqadagi boshqa tuzilmalarni bor kuchi bilan qo‘llab-quvvatlashda davom etadi, degan Eronning saylangan prezidenti Masʼud Pezeshkiyon.
Pezeshkiyon, shuningdek, Eronning Isroil rejimiga qarshi faoliyatiga ham urg‘u bergan. Yaqin Sharqdagi Tel-Avivga qarshi kuchlarni qo‘llash davom etishi bildirilgan.
“Eron har doim mintaqa xalqlarining noqonuniy sionistik rejimga (Isroil) qarshiligini qo‘llab-quvvatlab kelgan. Bu siyosat bundan keyin ham davom etadi”, degan Pezeshkiyon Hasan Nasrullohga jo‘natgan maktubida.
Tehron hukumati rahbari qarshilik kuchlari Isroil va AQSHga qarshi muvaffaqiyat qozonishi mumkinligiga ishora qilgan. Eronning ularga munosabati davomiy va o‘zgarmas bo‘lishini aytgan.
“Men mintaqadagi qarshilik harakati Falastin va mintaqadagi boshqa xalqlarga qarshi urush qo‘zg‘atuvchi va jinoiy siyosatning davom etishiga to‘sqinlik qilishiga ishonaman”, deyiladi Eron prezidenti xabarida.
Maʼlumot o‘rnida, Eronda barcha davlat masalalari, jumladan, tashqi siyosat va yadroviy dastur bo‘yicha oliy hokimiyat prezident emas, amalda mamlakat oliy rahbariga tegishli. Shu sababli Eronning mintaqadagi ittifoqchi qurolli kuchlarni qo‘llab-quvvatlash siyosati yangi prezident saylangandan so‘ng ham, katta ehtimol bilan, o‘zgarishsiz qolishi mumkin.
Hozirda mamlakatning oliy rahbari Sayid Ali Xomanaiy hisoblanadi. U 85 yoshda bo‘lib, Eron xalqaro va ichki yo‘nalishini hamda shia kengashini 1989-yildan beri idora qilib kelmoqda.
Izoh (0)