Эроннинг яқинда сайланган президенти Масъуд Пезешкиён Ливаннинг “Ҳизбуллоҳ” гуруҳини қўллашга ваъда берди. Бу ҳақда раҳбарнинг давлат телевидениесига берган интервьюсига асосланиб, Al Arabiya нашри хабар берди.
Манбада айтилишича, вазифага киришганига кўп бўлмаган Пезешкиён “Ҳизбуллоҳ” раҳбари Ҳасан Насруллоҳга хат йўллаган. Унда Эрон гуруҳни қўллашни давом эттириши, Яқин Шарқда тинчликка эришиш учун катта саъй-ҳаракатлар қилиниши айтилган.
Эроннинг “Ҳизбуллоҳ” гуруҳини ва минтақадаги бошқа тузилмаларни бор кучи билан қўллаб-қувватлашда давом этади, деган Эроннинг сайланган президенти Масъуд Пезешкиён.
Пезешкиён, шунингдек, Эроннинг Исроил режимига қарши фаолиятига ҳам урғу берган. Яқин Шарқдаги Тель-Авивга қарши кучларни қўллаш давом этиши билдирилган.
“Эрон ҳар доим минтақа халқларининг ноқонуний сионистик режимга (Исроил) қаршилигини қўллаб-қувватлаб келган. Бу сиёсат бундан кейин ҳам давом этади”, деган Пезешкиён Ҳасан Насруллоҳга жўнатган мактубида.
Теҳрон ҳукумати раҳбари қаршилик кучлари Исроил ва АҚШга қарши муваффақият қозониши мумкинлигига ишора қилган. Эроннинг уларга муносабати давомий ва ўзгармас бўлишини айтган.
“Мен минтақадаги қаршилик ҳаракати Фаластин ва минтақадаги бошқа халқларга қарши уруш қўзғатувчи ва жиноий сиёсатнинг давом этишига тўсқинлик қилишига ишонаман”, дейилади Эрон президенти хабарида.
Маълумот ўрнида, Эронда барча давлат масалалари, жумладан, ташқи сиёсат ва ядровий дастур бўйича олий ҳокимият президент эмас, амалда мамлакат олий раҳбарига тегишли. Шу сабабли Эроннинг минтақадаги иттифоқчи қуролли кучларни қўллаб-қувватлаш сиёсати янги президент сайлангандан сўнг ҳам, катта эҳтимол билан, ўзгаришсиз қолиши мумкин.
Ҳозирда мамлакатнинг олий раҳбари Сайид Али Хоманаий ҳисобланади. У 85 ёшда бўлиб, Эрон халқаро ва ички йўналишини ҳамда шиа кенгашини 1989 йилдан бери идора қилиб келмоқда.
Изоҳ (0)