“Beril” to‘foni Texas shtatida 3 millionga yaqin xonadonni elektr energiyasiz qoldirdi

AQSHning Texas shtatida “Beril” to‘foni oqibatida 2,7 million xonadon elektr tarmog‘idan uzilib qoldi. Bu haqda Reuters nashri xabar berdi.

Manbada aytilishicha, 8-iyul kuni Texas shtatining janubi-sharqida shiddatli shamol va kuchli yog‘ingarchilik kuzatilgan. Yirik magistrallarni suv bosgan, neft tashiladigan portlar faoliyatini to‘xtatgan.

To‘fon oqibatida hozirga qadar 3 kishi halok bo‘lgan. 1300 dan ortiq reyslar bekor qilingan. 2,7 milliondan ortiq xonadon elektr va suv tarmog‘idan uzilib qolgan.

Halokatli to‘fon Texasning qirg‘oq bo‘yidagi Matagorda va Hyuston shaharlariga eng ko‘p zarar yetkazgan. Iqlimning noodatiy o‘zgarishi tufayli “Beril” kabi to‘fonlar Luiziana va Arkanzas shtatlarida ham yuz berishi mumkinligi eʼlon qilingan.

“Beril” to‘foni AQSH sohillariga yetib kelishidan oldin Karib havzasi atrofidagi ko‘plab mamlakatlarga talafotlar keltirgan. Qariyb bir hafta davomida Yamayka, Grenada, Sent-Vinsent va Grenadin hududlari dahshatli tabiiy ofat bilan kurashgan. Ushbu mamlakatlarda 11 fuqaro halok bo‘lgani xabar qilingan.

Texas shtati bo‘ylab fuqarolarga 2500 dan ortiq birinchi tibbiy yordam ko‘rsatilgan. O‘ta xavfli hududlardan fuqarolar ko‘chirilgan. To‘fon yaqinlashgan hududlarda aholidan o‘zboshimchalik bilan uylaridan chiqib ketmaslik so‘ralgan.