Afg‘onistondagi suv toshqinida 17 kishi halok bo‘ldi

Afg‘onistonning Bomiyon viloyatida kuzatilgan suv toshqini oqibatida ikki oilaning 17 nafar a’zosi halok bo‘ldi. Bu haqda Hasht-e Subh Daily xabar berdi.

Viloyatdagi “Tolibon” xavfsizlik qo‘mondonligi matbuot kotibi Abdul Sabour Sig‘oniy ma’lumotni tasdiqlagan. U hozirgacha 7 nafar suv toshqini qurbonlarining jasadi topilganini, yana 10 kishi esa bedarak yo‘qolganini aytgan. Tabiiy ofat Hazar Chashme, Dazdan Chashme va Pudinah tumanlarida kuzatilgan.

Bomiyon viloyati gubernatori Abdulla Sarhadiy suv toshqinidan jabr ko‘rgan hududga borgan, qutqaruv guruhlari ham voqea joyiga yetib kelgan. Halok bo‘lganlar orasida erkaklar va ayollardan tashqari bolalar ham bor. So‘nggi oylarda Afg‘onistonning turli viloyatlarida kuchli yomg‘irlar va keng ko‘lamli suv toshqinlari yuz berdi, yuzlab odamlar halok bo‘ldi.