Shavkat Mirziyoyev Ilhom Aliyev taklifiga binoan 5—6-iyul kunlari amaliy tashrif bilan Ozarbayjonda bo‘ladi. Bu haqda Prezident matbuot xizmati xabar berdi.
Ma’lum qilinishicha, davlat rahbari Shusha shahrida bo‘lib o‘tadigan Turkiy davlatlar tashkilotining “Transport o‘zaro bog‘liqligi va iqlim o‘zgarishiga qarshi kurashish orqali barqaror kelajakni barpo etish” mavzusidagi norasmiy sammitida ishtirok etadi.
Sammit davomida ko‘p tomonlama hamkorlikni, eng avvalo, savdo-iqtisodiyot, transport-kommunikatsiya va investitsiya-moliya sohalarida, shuningdek, “yashil” iqtisodiyot, qayta tiklanadigan energetika, iqlim o‘zgarishiga qarshi kurashish va inson kapitalini rivojlantirish yo‘nalishlarida yanada kengaytirish masalalari muhokama qilinadi.
Delegatsiyalar rahbarlari xalqaro va mintaqaviy ahamiyatga molik dolzarb masalalarni ham ko‘rib chiqadi. Tadbir yakunida qator qo‘shma hujjatlar qabul qilinishi ko‘zda tutilgan.
Shavkat Mirziyoyev bundan avval 3—4-iyul kunlari amaliy tashrif bilan Qozog‘istonda bo‘lgandi. Prezident SHHT davlat rahbarlari kengashining navbatdagi majlisida va “SHHT +” formatidagi uchrashuvda ishtirok etib, tashkilot makonida ko‘p qirrali sheriklikni yanada kengaytirishga qaratilgan qator muhim taklif va tashabbuslarni ilgari surdi.
Izoh (0)