Шавкат Мирзиёев Илҳом Алиев таклифига биноан 5—6 июль кунлари амалий ташриф билан Озарбайжонда бўлади. Бу ҳақда Президент матбуот хизмати хабар берди.
Маълум қилинишича, давлат раҳбари Шуша шаҳрида бўлиб ўтадиган Туркий давлатлар ташкилотининг “Транспорт ўзаро боғлиқлиги ва иқлим ўзгаришига қарши курашиш орқали барқарор келажакни барпо этиш” мавзусидаги норасмий саммитида иштирок этади.
Саммит давомида кўп томонлама ҳамкорликни, энг аввало, савдо-иқтисодиёт, транспорт-коммуникация ва инвестиция-молия соҳаларида, шунингдек, “яшил” иқтисодиёт, қайта тикланадиган энергетика, иқлим ўзгаришига қарши курашиш ва инсон капиталини ривожлантириш йўналишларида янада кенгайтириш масалалари муҳокама қилинади.
Делегациялар раҳбарлари халқаро ва минтақавий аҳамиятга молик долзарб масалаларни ҳам кўриб чиқади. Тадбир якунида қатор қўшма ҳужжатлар қабул қилиниши кўзда тутилган.
Шавкат Мирзиёев бундан аввал 3—4 июль кунлари амалий ташриф билан Қозоғистонда бўлганди. Президент ШҲТ давлат раҳбарлари кенгашининг навбатдаги мажлисида ва “ШҲТ +” форматидаги учрашувда иштирок этиб, ташкилот маконида кўп қиррали шерикликни янада кенгайтиришга қаратилган қатор муҳим таклиф ва ташаббусларни илгари сурди.
Изоҳ (0)