Qirg‘izistonda 1-iyul kuni ekzotik qushlarning O‘zbekistondan noqonuniy importiga chek qo‘yilgan. Bu haqda Qirg‘iziston chegara xavfsizlik xizmati bergan xabarga asoslanib, “24.kg” nashri maʼlumot berdi.
Holat haqida dastlab Qirg‘iziston Milliy xavfsizlik davlat qo‘mitasi chegara xizmati axborot va kommunikatsiyalar boshqarmasi xabar bergan. Tegishli qonunchilik hujjatlarini shakllantirmasdan ekzotik qushlarni chegaradan o‘tkazishga uringan shaxs to‘xtatilgan.
Manbaga ko‘ra, dushanba kuni Qirg‘izistonning 39 yoshli fuqarosi Matiz rusumli avtomashinada Qadamjoy tumanining Yangiyer massivi hududidagi o‘tkazish punkti orqali O‘zbekistondan Qirg‘izistonga 160 bosh to'ti va 6 ta tuyaqush jo‘jasini noqonuniy ravishda olib kirishga uringan.
Haydovchi qushlar solingan qafaslarni shaxsiy buyumlari bilan o‘ragan hamda mashina tomiga joylashtirgan. Hayvonlarni olib o‘tishga ruxsat beruvchi hech qanday normativ hujjatlari bo‘lmagan shaxs chegara nizomiga muvofiq to‘xtatilgan.
Chegara punkti nazoratchilari qushlarni mashina tomidan tushirib olgan va taxminiy qiymatini hisoblab chiqqan. Kontrabanda yukining umumiy qiymati qirg‘iz valyutasida 774 ming 500 so‘mni tashkil etgan (o‘zbek valyutasida 113 million so‘m).
Holat yuzasidan tegishli hujjatlar to‘ldirilib, fuqaro va qushlar qo‘shimcha tergov o‘tkazish uchun vakolatli organlar xodimlariga topshirildi. Hozirda surishtiruv jarayoni davom etayotgani xabar qilingan.
Izoh (0)