Қирғизистонда 1 июль куни экзотик қушларнинг Ўзбекистондан ноқонуний импортига чек қўйилган. Бу ҳақда Қирғизистон чегара хавфсизлик хизмати берган хабарга асосланиб, “24.кг” нашри маълумот берди.
Ҳолат ҳақида дастлаб Қирғизистон Миллий хавфсизлик давлат қўмитаси чегара хизмати ахборот ва коммуникациялар бошқармаси хабар берган. Тегишли қонунчилик ҳужжатларини шакллантирмасдан экзотик қушларни чегарадан ўтказишга уринган шахс тўхтатилган.
Манбага кўра, душанба куни Қирғизистоннинг 39 ёшли фуқароси Matiz русумли автомашинада Қадамжой туманининг Янгиер массиви ҳудудидаги ўтказиш пункти орқали Ўзбекистондан Қирғизистонга 160 бош тўти ва 6 та туяқуш жўжасини ноқонуний равишда олиб киришга уринган.
Ҳайдовчи қушлар солинган қафасларни шахсий буюмлари билан ўраган ҳамда машина томига жойлаштирган. Ҳайвонларни олиб ўтишга рухсат берувчи ҳеч қандай норматив ҳужжатлари бўлмаган шахс чегара низомига мувофиқ тўхтатилган.
Чегара пункти назоратчилари қушларни машина томидан тушириб олган ва тахминий қийматини ҳисоблаб чиққан. Контрабанда юкининг умумий қиймати қирғиз валютасида 774 минг 500 сўмни ташкил этган (ўзбек валютасида 113 миллион сўм).
Ҳолат юзасидан тегишли ҳужжатлар тўлдирилиб, фуқаро ва қушлар қўшимча тергов ўтказиш учун ваколатли органлар ходимларига топширилди. Ҳозирда суриштирув жараёни давом этаётгани хабар қилинган.
Изоҳ (0)