O‘zbekiston seldan jabr ko‘rgan O‘sh viloyatiga 3-iyul kuni insonparvarlik yordami yubordi.
Qirg‘iziston FVV matbuot xizmatining xabar qilishicha, 95 tonna yuk un, shakar, o‘simlik yog‘i boshqa oziq-ovqat mahsulotlaridan iborat.
Ushbu gumanitar yordam O‘zbekiston favqulodda vaziyatlar vazirining birinchi o‘rinbosari Sanjarbek Zuparov boshchiligida olib kelingan bo‘lib, ularni Qirg‘iziston favqulodda vaziyatlar vaziri o‘rinbosari Akilbek Mazaripov va Qirg‘iziston prezidentining O‘sh viloyatidagi vakolatli vakili o‘rinbosari Ilyos Toshboyev qabul qilib oldi.
28-iyun kuni O‘sh viloyati Nookat tumani Abshir Ota qishlog‘iga sel kelishi oqibatida 9 kishi halok bo‘ldi. 2-iyul kuni qurbonlar soni 10 kishiga yetdi.
Ko‘priklar va yo‘llarning vayron bo‘lishiga, odamlarning o‘limiga sabab bo‘lgan sel oqibatida Nookat tumanida favqulodda holat e’lon qilindi. Abshir Ota dam olish maskanida 1300 dan ortiq odam qolib ketgan, ularning barchasi evakuatsiya qilingan.
Izoh (0)