Raqobat qo‘mitasi ijtimoiy tarmoqlarda berilgan lift importi muammosi bo‘yicha xabarlarga rasmiy munosabat bildirdi.
Iqtisodchi Otabek Bakirov notarif cheklovlar bilan taqiqlangan lift importi muammosi hal bo‘lgani yo‘qligi to‘g‘risida yozdi. U Senat qo‘mitasi raisining aralashuvi bilan 36 ta tadbirkor 150 ta liftini bojxona omborlaridan olib chiqilgani, lekin bu liftlar 3 oydan ortiq bojxona omborlaridan chiqarilmay turilganiga e’tibor qaratgan.
Raqobatni rivojlantirish va isteʼmolchilar huquqlarini himoya qilish qo‘mitasi tomonidan chop etilgan bir guruh tadbirkorlarning mazkur murojaatiga asosan, lift va lift uskunalarini import qilishda vujudga kelayotgan muammolar vakolat doirasida o‘rganib chiqilgan.
“Sanoat xavfsizligi” davlat muassasasining xabariga ko‘ra, lift uskunalariga 3-chizma asosida berilgan muvofiqlik sertifikatlari Vazirlar Mahkamasi qarori bilan tasdiqlangan reglamentga kiritilgan qo‘shimcha talablarga asosan bekor qilingan. Shuningdek, “Sanoat xavfsizligi” davlat muassasasining mahsulotlarni sertifikatlashtirish organi faoliyati davriy baholash natijalariga ko‘ra vaqtinchalik to‘xtatilgan.
Biroq liftlarning xavfsizligiga doir qo‘shimcha talablar saqlab qolingani, ishlab chiqarish jarayoniga (3-chizma bo‘yicha) berilgan 17 ta muvofiqlik sertifikatlarining amal qilishi to‘xtatilgani sababli importyor korxonalar tomonidan bugungi kunda respublika hududiga olib kelingan lift va eskalator uskunalar omborlarda qolib ketmoqda.
Raqobat qo‘mitasi tomonidan lift va lift mahsulotlarini importi bilan shug‘ullanuvchi tadbirkorlik subyektlarini qiynayotgan masalalarni bartaraf etish maqsadida Tog‘-kon sanoati va geologiya vazirligi va Vazirlar Mahkamasiga quyidagi takliflar kiritilgan.
- Vakolatli organ tomonidan bekor qilingan 17 ta muvofiqlik sertifatini istisno tariqasida tiklash choralarini ko‘rish;
- mavjud bo‘lgan sinov laboratoriyalarining moddiy-texnika bazasini yaxshilash uchun(lift, lift uskunalari va eskalatorlarni sinovdan o‘tkazish sinov uchun zarur bo‘lgan sinov minoralari va asbob-uskunalarni olib kirish) chet el grant mablag‘larini jalb etish choralarini ko‘rish;
- liftlarni sinovdan o‘tkazish va muvofiqlik sertifikatini berish bo‘yicha xizmatlar bozoriga xususiy sektorni keng jalb qilish choralarini ko‘rish;
- sertifikatlash jarayonida bir shartnoma doirasida olib kelinayotgan marka va modeli bir xil bo‘lgan lift tovarlarini faqatgina bir nusxasini sinovdan o‘tkazish orqali ularga bitta muvofiqlik sertifikatini rasmiylashtirish amaliyotini joriy qilish.
Eslatib o‘tamiz, 2023-yil sentyabrda Tog‘-kon sanoati va geologiya vazirligi, Qurilish va uy-joy kommunal xo‘jaligi vazirligi Qoraqalpog‘iston Vazirlar Kengashi, viloyatlar va Toshkent shahar hokimliklari bilan birgalikda liftlardan foydalanishda sodir bo‘lgan baxtsiz hodisalar sabablarini tahlil qilgan holda, kelgusida bunday holatlarning oldini olish choralarini ko‘rishi to‘g‘isida xabar berilgandi.
Izoh (0)