Тошкентда салкам 3 млрд сўмлик матоларнинг божхона тўловларисиз олиб кирилишига чек қўйилди

Тошкент шаҳар божхона бошқармаси ходимлари салкам 3 миллиард сўмлик матоларни божхона тўловларисиз олиб кирилишига чек қўйди.

Қайд этилишича, “Арк булоқ” ташқи иқтисодий фаолият божхона постида аниқланган дастлабки ҳолатда пойтахтдаги масъулияти чекланган жамиятлардан бирининг номига келтирилган 106 минг метр квадрат ўлчамдаги матолар божхона кўригидан ўтказилган.

Натижада, ушбу товарларга тегишли кодлар божхона юк декларациясида нотўғри қайд этилгани аниқланган. Шу тариқа қиймати 2 миллиард 128 миллион сўмлик матоларни имтиёз асосида, яъни божхона тўловларисиз олиб киришга бўлган уринишнинг олди олинган.

Мазкур постда аниқланган худди шундай яна бир ҳолатда ҳам божхона юк декларациясида товар кодини нотўғри таснифлаш орқали қиймати 784 миллион сўмлик салкам 13 тонна матоларни божхона тўловларисиз олиб киришга бўлган уринишнинг олди олинган.

Ҳозирда аниқланган ҳолатлар юзасидан божхона текширувлари давом эттирилмоқда.

• Аввалроқ “Яллама” постида 830 млн сўмлик LED чироқларнинг мамлакатга ноқонуний олиб кирилишига чек қўйилгани тўғрисида хабар берилганди.
• Шунингдек, Бухорода 15,5 млрд сўмлик пестицидларнинг мамлакатга ноқонуний олиб кирилишининг олди олинган эди.