Toshkent viloyati “Oybek” chegara bojxona postida noqonuniy yo‘l bilan xorij valyutasi mamlakatga kirib kelishining oldi olindi. Bu haqda viloyat bojxona boshqarmasi matbuot xizmati xabar berdi.
Qayd etilishicha, O‘zbekiston hududiga o‘tish uchun “Oybek” chegara bojxona postiga fuqaro boshqaruvida kirib kelgan avtotransport vositasi belgilangan tartibda bojxona ko‘rigidan o‘tkazilgan.
Natijada, avtotransport vositasi salonining yuqori qismida, shaxsiy buyumlar orasidan, yo‘lovchi bojxona deklaratsiyasida yozib ko‘rsatilmagan va og‘zaki so‘rovda maʼlum qilinmagan 2 million Rossiya rubli borligi aniqlangan.
Hozirda bojxona organlari tomonidan dastlabki tergov harakatlari olib borilmoqda.
O‘zbekiston fuqarolari hamda doimiy yashash joyiga ega bo‘lgan va fuqaroligi bo‘lmagan shaxslarga 100 million so‘m ekvivalentiga teng yoki undan oshmaydigan miqdorda naqd xorijiy valyutani yo‘lovchi bojxona deklaratsiyasida ko‘rsatgan holda erkin olib chiqib ketishlariga ruxsat etiladi.
Aprel o‘rtalarida Toshkent viloyatida 670 ming rublni bojxonadan noqonuniy olib o‘tmoqchi bo‘lgan ayol to‘xtatib qolingandi. Shuningdek, “Yallama” postida 830 mln so‘mlik LED chiroqlarning mamlakatga noqonuniy olib kirilishiga chek qo‘yilgani to‘g‘risida xabar berilgandi. Shuningdek, Buxoroda 15,5 mlrd so‘mlik pestitsidlarning mamlakatga noqonuniy olib kirilishiga chek qo‘yilgan edi.
Izoh (0)