Toshkent shahar Yunusobod tumani, Moyqo‘rg‘on ko‘chasi va Qoraqamish ko‘chalari kesishmasida katta suv o‘tkazgich tarmoqda nosozlik vujudga kelgani haqida xabar berilgandi. FVV hodisa oqibatlari haqida ma’lumot berdi.
Unga ko‘ra, hodisa oqibatlarini bartaraf etish yuzasidan tezkor ishchi guruh tuzilgan bo‘lib, voqea joyga zudlik bilan Favqulodda vaziyatlar vazirligi va FVDT tarkibiga kiruvchi korxona, tashkilotlarning kuch vositalari jalb etilgan. Hozirgi vaqtda Toshkent shahar “O‘zsuvta’minot” tomonidan quvurlarda suv bosimi kamaytirilib, ta’mirlash ishlari olib borilmoqda.
Holat oqibatida 13 ta ko‘p qavatli uyning yerto‘la qismi va ichki yo‘llarga suv kirishi kuzatilgan. Hodisa natijasida tan jarohati olgan va halok bo‘lganlar yo‘q.
Vaziyat to‘liq nazoratga olingan. Yaqin soatlarda vaziyat bartaraf etiladi.
Toshkent shahar “Suv taʼminoti” axborot xizmati boshlig‘i holat sababini ochiqladi.
Unga ko‘ra, holatga yaqin hududda joylashgan qozonxonada vaqtincha elektr taʼminoti uzilgani sabab bo‘lgan. Hozirda qisqa vaqt ichida avariyani bartaraf etish choralari ko‘rilmoqda.
“Yaqin hududda joylashgan qozonxonada vaqtincha elektr taʼminoti uzilgani sababli quvurlarda bosim ko‘tarilib ketgan va avariya holati yuzaga kelgan. Hozirda qisqa vaqt ichida avariyani bartaraf etish choralari ko‘rilmoqda. Mutasaddi rahbarlardan tortib oddiy ishchilargacha barcha tik oyoqda. Vahimaga hojat yo‘q”, — Toshkent shahar “Suv taʼminoti” axborot xizmati boshlig‘i Ravshan Yoqubjonov.
Hodisa sababli, Tiklanish mahallasi 1, 2, 3, 4, 5, 6 tor ko‘chalari, G‘ishtqo‘rg‘on ko‘chalari, “Astrabod” mahallasi, Turkiston, “Sobirobod” mahallalarida, Zenit zavodi, Prokuratura akademiyasi, Pivo zavodida suv taʼminoti vaqtincha to‘xtatildi.
Shu bilan birga ushbu hududda joylashgan muassasa, korxona va tashkilotlarda ham suv bo‘lmaydi.
Suv quvuri yorilib toshgani natijasida avtotransport vositalarini harakati vaqtinchalik cheklanmoqda. Shu munosabat bilan, mazkur ko‘chalardan harakatlanuvchi 6, 24 va 142-sonli avtobus yo‘nalishlarining qatnov va oraliq interval vaqtlari reja asosida tashkil etilishida vaqtincha uzilishlar kuzatilishi mumkin.
Izoh (0)