Farg‘ona viloyati hokimi Xayrullo Bozorov Xitoyning Shiyan Zhenke Industrial Technology kompaniyasi rahbari Syao Syansyanni qabul qildi. Bu haqda viloyat hokimligi matbuot xizmati xabar berdi.
Uchrashuvda Xitoy kompaniyasi tomonidan Farg‘onada ikki bosqichda amalga oshirish rejalashtirilayotgan maxsus transport vositalari ishlab chiqarish investitsion loyihasi muhokama qilingan.
Ikki bosqichli investitsion loyihaning dastlabki bosqichida 20 million dollar investitsiya hisobiga Farg‘onada yig‘ish, payvandlash va bo‘yash liniyalari tashkil etilib, yiliga 500 ta maxsus transport vositalari ishlab chiqariladi. Ikkinchi bosqichda qo‘shimcha 20 million dollar investitsiya yo‘naltirilib, ishlab chiqarish quvvati oyiga 100 taga yetkaziladi. Loyihani to‘la amalga oshirish muddati 3 yilni tashkil etishi maʼlum qilingan. Ishlab chiqariladigan transportlar bozorga yangi mahalliy brend ostida yetkazib beriladi.
Xitoy tomoni loyihani joylashtirish bo‘yicha viloyatdagi kichik sanoat zonalari hamda Qo‘qon EIZ hududidagi mavjud imkoniyatlarni o‘rganib chiqqach, muzokaralarni davom ettirishga kelishib olingan.
Avvalroq Xitoy kompaniyasi Farg‘onada yirik avtomobilsozlik majmuasini barpo etishi, O‘zbekistonda birinchi chiqindilarni yoqish zavodini qurish rejalashtirilayotgani to‘g‘risida xabar berilgandi.
Izoh (0)