Abbosbek Fayzullayev Parij Olimpiadasida ishtirok etadimi? “SSKA” bosh murabbiyi ushbu savolga javob berdi

“SSKA” bosh murabbiyi Marko Nikolich Abbosbek Fayzullayevning Parij Olimpiadasida ishtirok etishi borasidagi savollarga javob berdi.

“Abbos Olimpiadada O‘zbekiston safida maydonga tushadimi? Olimpiada o‘yinlari futbolchi hayotida bir marta bo‘lishi mumkin. Bu — mening javobim. Oldimizda ikki hafta bor, u o‘zini qanday his qilayotganiga qaraymiz. Lekin futbolchini qanday qilib hayotida bir marta berilayotgan imkoniyatdan mahrum qilish mumkin?”, — deydi Nikolich.

Eslatib o‘tamiz, Parijda bo‘lib o‘tadigan Olimpiada 26-iyul kuni start oladi va 11-avgustga qadar davom etadi. Futbol bo‘yicha O‘zbekiston U-23 terma jamoasi C guruhidan joy olgan va guruhda Ispaniya, Misr hamda Dominikan Respublikalariga qarshi bahs olib boradi.

• Abbosbek joriy mavsum “SSKA” tarkibida barcha musobaqalarda 32 ta o‘yin o‘tkazib, 5 ta gol va 14 ta golli uzatmaga mualliflik qildi. 
• Futbolchi Rossiya Premyer Ligasida “Mavsum kashfiyoti” sovrini egasiga aylandi.