Lego o‘yinchog‘idan yasalgan afsonaviy Polaroid fotoapparati taqdim etildi

Lego Ideas fan platformasi 516 dona lego detalidan yig‘ilgan mashhur OneStep SX-70 tezkor kamerasini taqdim etdi.

Polaroid SX-70 yig‘iladigan tezkor kamera bo‘lib, 1972-yilda kompaniya asoschisi Edvin H. Land tomonidan chiqarilgan va xitga aylangan edi. 1977-yilda bo‘lsa, OneStep deb nomlangan arzonroq versiyasi paydo bo‘lgan. Aynan shu model Lego Ideasʼni o‘zlarining Polaroidlarini yaratishga ilhomlantirdi.

Loyiha g‘oyasi MinibrickProductions YouTube kanali boshlovchisiga tegishli. Uning so‘zlariga ko‘ra, OneStepni yaratishga bir oydan sal ko‘proq vaqt ketgan.

Konstruksiya 516 ta detaldan iborat bo‘lib, Time-Zero Supercolor Land Film Fotokartalari ham lego kubiklaridan yasalgan.

Polaroid OneStep SX-70 2024-yil 1-yanvarda keng sotuvga chiqishi rejalashtirilmoqda.