AQSH sudi Gondurasning sobiq prezidenti Xuan Orlando Ernandezni giyohvand moddalar savdosida ayblab, 45 yillik qamoq jazosiga hukm qilgan. Bu haqda CNN nashri xabar berdi.
Gondurasning sobiq rahbariga nisbatan sud jarayonlari joriy yilning mart oyida boshlangan. Nyu-Yorkdagi Manhattan federal sudi Orlando Ernandezni uchta holat bo‘yicha giyohvand moddalar savdosida aybdir deb topgan.
Manbada aytilishicha, ayblanuvchiga nisbatan ilk ayblovlar 2022-yilda ko‘tarilgan. AQSH Adliya vazirligi unga qarshi giyohvand moddalar savdosi va o‘qotar qurollar bilan bog‘liq uchta ayblov qo‘yganidan keyin sobiq siyosatchi Ernandez Gondurasdan ekstraditsiya qilingan.
Prokurorlar 55 yoshli Ernandezni 400 tonnadan ortiq kokainni Gonduras orqali Qo‘shma Shtatlar tomon olib o‘tishni rejalashtirgan jinoiy kartellar bilan til biriktirganlikda ayblagan. Giyohvand moddalar tranziti evaziga kartellar Gonduras rahbariga katta miqdorda pul taklif qilgan.
AQSH Adliya departamenti aytishicha, Ernandez 2014-2022 yillarda Gonduras prezidenti bo‘lgan paytda o‘z hokimiyati atrofida uyushgan giyohvand moddalar sotuvchi transmilliy jinoyatchilarni himoya qilgan va ularni boyitgan. Mamlakatda narkotiklarning erkin harakatiga qo‘yib bergan. Hattoki politsiyaga narkobaronlarni himoya qilish topshirilgan.
AQSH Bosh prokurori Merrik Garland o‘z bayonotida Orlando Ernandez prezident lavozimini suiisteʼmol qilish, mamlakatni narkotik tranzit zonasiga aylantirish, giyohvand moddalar sotuvchilariga jazosiz ishlashga ruxsat berish kabi moddalar bo‘yicha aybdor deb topilganini maʼlum qilgan. Unga 8 million dollar hajmida jarima ham belgilangan.
Xuan Orlando Ernandez o‘ziga qo‘yilgan ayblovlarni keskin rad etgan. Barcha ayblovlar Gondurasdagi yangi hukumatning unga nisbatan qilayotgan aldamchi targ‘iboti ekanini bildirgan.
Izoh (0)