АҚШ суди Гондураснинг собиқ президенти Хуан Орландо Эрнандезни гиёҳванд моддалар савдосида айблаб, 45 йиллик қамоқ жазосига ҳукм қилган. Бу ҳақда CNN нашри хабар берди.
Гондураснинг собиқ раҳбарига нисбатан суд жараёнлари жорий йилнинг март ойида бошланган. Нью-Йоркдаги Манҳаттан федерал суди Орландо Эрнандезни учта ҳолат бўйича гиёҳванд моддалар савдосида айбдир деб топган.
Манбада айтилишича, айбланувчига нисбатан илк айбловлар 2022 йилда кўтарилган. АҚШ Адлия вазирлиги унга қарши гиёҳванд моддалар савдоси ва ўқотар қуроллар билан боғлиқ учта айблов қўйганидан кейин собиқ сиёсатчи Эрнандез Гондурасдан экстрадиция қилинган.
Прокурорлар 55 ёшли Эрнандезни 400 тоннадан ортиқ кокаинни Гондурас орқали Қўшма Штатлар томон олиб ўтишни режалаштирган жиноий картеллар билан тил бириктирганликда айблаган. Гиёҳванд моддалар транзити эвазига картеллар Гондурас раҳбарига катта миқдорда пул таклиф қилган.
АҚШ Адлия департаменти айтишича, Эрнандез 2014-2022 йилларда Гондурас президенти бўлган пайтда ўз ҳокимияти атрофида уюшган гиёҳванд моддалар сотувчи трансмиллий жиноятчиларни ҳимоя қилган ва уларни бойитган. Мамлакатда наркотикларнинг эркин ҳаракатига қўйиб берган. Ҳаттоки полицияга наркобаронларни ҳимоя қилиш топширилган.
АҚШ Бош прокурори Меррик Гарланд ўз баёнотида Орландо Эрнандез президент лавозимини суиистеъмол қилиш, мамлакатни наркотик транзит зонасига айлантириш, гиёҳванд моддалар сотувчиларига жазосиз ишлашга рухсат бериш каби моддалар бўйича айбдор деб топилганини маълум қилган. Унга 8 миллион доллар ҳажмида жарима ҳам белгиланган.
Хуан Орландо Эрнандез ўзига қўйилган айбловларни кескин рад этган. Барча айбловлар Гондурасдаги янги ҳукуматнинг унга нисбатан қилаётган алдамчи тарғиботи эканини билдирган.
Изоҳ (0)