Boliviyada 26-iyun kuni harbiylar davlat to‘ntarishi tashkil etishga uringan. Bu haqda Lotin Amerikasi manbalariga asoslanib, CNN nashri xabar berdi.
Manbada aytilishicha, chorshanba kuni Boliviya armiyasi qo‘mondoni, general Xuan Xose Suniga boshchiligidagi bir guruh harbiylar mamlakat rahbariyatiga qarshi isyon tashkil etgan. Harbiylar qisqa muddatda prezident saroyi va poytaxtning muhim strategik va mudofaa obyektlari atrofida hujumlar tashkil etgan.
Boliviya prezidenti Luis Arse xalqni demokratiyani himoya qilish uchun “uyushish va harakatga kelishga” chaqirgan. Poytaxt La-Pasdagi hukumat binolarini o‘rab olgan isyonchi askarlar va zirhli harbiy mashinalar yo‘lini to‘sishga, ularni harakatdan to‘xtatishga chaqirgan.
“Biz harbiy to‘ntarish boliviyaliklar hayotini yana bir bor izdan chiqarishiga yo‘l qo‘yib bera olmaymiz. Hukumat hammani demokratiyani himoya qilishga chaqiradi”, — degan prezident Arse davlat to‘ntarishiga urinish boshlangan paytda prezident qarorgohida eʼlon qilgan bayonotida.
Manbada aytilishicha, isyonchi askarlar milliy ijroiya va qonun chiqaruvchi idoralar joylashgan Murillo Plaza markaziy maydonida asosiy kuchlarini to‘plagan. Keyinchalik aynan ushbu maydondan yuborilgan zirhli mashinalar prezident saroyiga kirishga uringan. Hodisa haqida Mamlakatning sobiq prezidenti Evo Morales birinchilardan bo‘lib xabar bergan va harbiy bezovtalanishini “to‘ntarish” deya baholagan.
Mamlakat rahbari murojaati bilan tinch aholi harbiylarga qarshi norozilik bildirib ko‘chaga chiqqan. Poytaxtning markaziy nuqtalarida harbiylar va tinch aholi to‘qnashuvi yuz bergan.
Manbaga ko‘ra, harbiy holat munosabati bilan prezident eʼlon qilgan murojaat oqibatida isyonchi harbiylar orasida bo‘linish yuz bergan. Xalq bilan qarama-qarshi bo‘lishni istamagan armiya guruhlari o‘z pozitsiyalarini tark eta boshlagan.
Boliviya maxsus operatsion kuchlari hali isyon davom etayotgan bir paytda g‘alayon tashkilotchilarini hibsga olish uchun operatsiya boshlagan. Tadbir o‘ta muvaffaqiyatli tashkil etilib, to‘ntarish tashkilotchisi, oldinroq qo‘mondonlikdan bo‘shatilgan Xuan Xose Suniga hibsga olinib, politsiya mashinasida olib ketilgan.
Qo‘lga olinishidan oldin eʼlon qilgan so‘nggi murojaatida Suniga isyon maqsadi demokratiyani tiklash, mamlakatni qutqarish ekanligini aytgan. Amaldagi hukumatni layoqatsizlikda ayblagan. Siyosiy mahbuslarni ozod qilishga va'da bergan.
“Biz demokratiyani tiklamoqchimiz. Bu xalqning kelajagi yo‘q, armiya esa farzandlarimiz kelajagi, xalqimiz farovonligi va taraqqiyoti haqida qayg‘urishga, jasorat ko‘rsatishga tayyor”, — degan Xuan Xose Suniga.
Isyon davom etayotgan bir paytda Boliviya armiyasining yangi tayinlangan generali Xose Sanchez barcha qurolli guruhlarga harakatni to‘xtatishni buyurgan. Rahbari qo‘lga olingan isyonchilar buyruqqa bo‘ysunib, shahar markazini tark etgan.
Boliviyada davlat to‘ntarishiga muvaffaqiyatsiz urinishdan so‘ng uch nafar harbiy rahbar qo‘lga olingani taadiqlangan. Ular orasida general Xuan Xose Sunigadan tashqari harbiy-havo kuchlari generali Marselo Xavyer Segarra va vitse-admiral Xuan Arnes Salvador ham bor. Ularning barchasi politsiya bo‘limiga olib ketilgan.
Boliviya Mudofaa vaziri Edmundo Novilloning so‘zlariga ko‘ra, hukumat davlat to‘ntarishiga urinishdan so‘ng mamlakat qurolli kuchlari ustidan to‘liq nazoratni saqlab turibdi.
Boliviya Bosh prokuraturasi chorshanba kuni kechqurun Zunigaga qarshi jinoiy tergov boshlagan. La-Pasdagi voqealarga aloqador bo‘lgan barcha boshqa ishtirokchilar ham tekshirilishi aytilgan.
Izoh (0)