O‘zmilliybank Xitoy davlat taraqqiyot bankining 2 mlrd yuan kredit liniyasini jalb qildi

Joriy yil 25-iyun kuni Qozog‘iston Respublikasining Ostona shahrida Shanxay hamkorlik tashkilotining (SHHT) Banklararo birlashmasi kengashining XX yig‘ilishi bo‘lib o‘tdi.

Yig‘ilishda SHHTga aʼzo davlatlarning moliya institutlari, jumladan, Hindiston infratuzilmani moliyalashtirish kompaniyasi, Qozog‘iston taraqqiyot banki, Xitoy davlat taraqqiyot banki, Qirg‘iz Respublikasining OAJ “Eldik bank”, Pokistonning Habib Banki, VEB.RF davlat taraqqiyot korporatsiyasi, Tojikistoning DUK “Amonatbank jamg‘arma banki” va O‘zmilliybank ishtirok etdi.

Ushbu nufuzli tadbir doirasida “O‘zbekiston Respublikasi tashqi iqtisodiy faoliyat milliy bank” AJ (keyingi o‘rinlarda — O‘zmilliybank) va Xitoy davlat taraqqiyot banki (keyingi o‘rinlarda — XDTB) o‘rtasida 2 mlrd Xitoy yuani miqdorida kredit liniyasini jalb qilish yuzasidan kelishuv imzolandi.

Ushbu kredit liniya birinchi navbatda O‘zbekiston Respublikasi Prezidenti tomonidan joriy yil 20-may kuni xorijiy investitsiyalarni jalb qilishda banklarning ishtirokiga oid yig‘ilishda bergan topshiriqlarini so‘zsiz bajarishga va iqtisodiyotimizning turli tarmoqlaridagi muhim loyihalarni amalga oshirish uchun zarur bo‘lgan investitsiyalarni taʼminlaydi. Bu esa mamlakatning iqtisodiy o‘sishini rag‘batlantirishga xizmat qiladi.

Bundan tashqari, XDTB kredit liniyasi:

- kichik va o‘rta biznes loyihalarini qo‘llab-quvvatlashga;

- aholi bandligini taʼminlash va turmush darajasini oshirishga;

- ikki mamlakatning o‘zaro savdo hajmini oshirishga xizmat qiladi.

Mazkur kredit liniyaning afzalligi moliyalashtirishning foiz stavkasi jozibadorligi hamda Xitoy bilan savdo aloqalarida milliy valyutalardan foydalanish, valyuta ayirboshlash bilan bog‘liq xarajatlarni kamaytirib, savdo aylanmasining kengayishiga olib keladi.

Reklama huquqi asosida.