Ўзмиллийбанк Хитой давлат тараққиёт банкининг 2 млрд юан кредит линиясини жалб қилди

Жорий йил 25 июнь куни Қозоғистон Республикасининг Остона шаҳрида Шанхай ҳамкорлик ташкилотининг (ШҲТ) Банклараро бирлашмаси кенгашининг ХХ йиғилиши бўлиб ўтди.

Йиғилишда ШҲТга аъзо давлатларнинг молия институтлари, жумладан, Ҳиндистон инфратузилмани молиялаштириш компанияси, Қозоғистон тараққиёт банки, Хитой давлат тараққиёт банки, Қирғиз Республикасининг ОАЖ “Элдик банк”, Покистоннинг Ҳабиб Банки, ВЕБ.РФ давлат тараққиёт корпорацияси, Тожикистонинг ДУК “Амонатбанк жамғарма банки” ва Ўзмиллийбанк иштирок этди.

Ушбу нуфузли тадбир доирасида “Ўзбекистон Республикаси ташқи иқтисодий фаолият миллий банк” АЖ (кейинги ўринларда — Ўзмиллийбанк) ва Хитой давлат тараққиёт банки (кейинги ўринларда — ХDTБ) ўртасида 2 млрд Хитой юани миқдорида кредит линиясини жалб қилиш юзасидан келишув имзоланди.

Ушбу кредит линия биринчи навбатда Ўзбекистон Республикаси Президенти томонидан жорий йил 20 май куни хорижий инвестицияларни жалб қилишда банкларнинг иштирокига оид йиғилишда берган топшириқларини сўзсиз бажаришга ва иқтисодиётимизнинг турли тармоқларидаги муҳим лойиҳаларни амалга ошириш учун зарур бўлган инвестицияларни таъминлайди. Бу эса мамлакатнинг иқтисодий ўсишини рағбатлантиришга хизмат қилади.

Бундан ташқари, ХDTБ кредит линияси:

- кичик ва ўрта бизнес лойиҳаларини қўллаб-қувватлашга;

- аҳоли бандлигини таъминлаш ва турмуш даражасини оширишга;

- икки мамлакатнинг ўзаро савдо ҳажмини оширишга хизмат қилади.

Мазкур кредит линиянинг афзаллиги молиялаштиришнинг фоиз ставкаси жозибадорлиги ҳамда Хитой билан савдо алоқаларида миллий валюталардан фойдаланиш, валюта айирбошлаш билан боғлиқ харажатларни камайтириб, савдо айланмасининг кенгайишига олиб келади.

Реклама ҳуқуқи асосида.