Bugun mamlakatimizda iqtisodiy islohotlar negizida amalga oshirilayotgan chora-tadbirlar hayotimizga innovatsion texnologiyalarni, bu jarayonlar esa yangi-yangi xizmat turlarini paydo boʼlishiga omil boʼlapti.
Eng asosiysi, servis tarmogʼi rivojlanishi natijasida yangi loyihalar ishga tushib, yangi ish oʼrinlari yaratilmoqda. Xalqning turmush darajasi yaxshilanmoqda. Hududlarda ishbilarmonlar koʼlami kengayib, tadbirkorlar qatlami shakllanmoqda.
Bugun xizmat koʼrsatish sohasida savdo xizmatlari, moliyaviy xizmatlar, transport xizmatlari, taʼlim sohasidagi xizmatlar, restoran va mehmonxona xizmati, tibbiy xizmat, turizm kabi qator yoʼnalishlarga eʼtibor qaratilayotgani fikrimiz tasdigʼidir.
Xususan, yurtimizda olib borilgan chora-tadbirlar natijasida yalpi ichki mahsulot hajmi joriy yilning birinchi yarim yilligida 751 trln. soʼmni tashkil etib, oʼtgan yilning mos davriga nisbatan 5,8 foizga oʼsdi.
Shuningdek, xizmatlar xajmi 329 trln. soʼmga yetkazilib, oʼtgan yilning mos davriga nisbatan 112 foizga oshgan.
Аytish joiz, xizmatlar sohasida aloqa va axborotlashtirish (125%), taʼlim (124%), moliya (118%) xizmatlaridagi oʼzgarishlar boshqa turdagi xizmatlarga nisbatan yuqori oʼsish boʼyicha natijalarni qayd etgan.
Bugungi kunda, mamlakatimizda faoliyat yuritayotgan korxonalarning 70 foizi xizmatlar sohasiga toʼgʼri keladi hamda jami band boʼlgan aholining 55 foizidan ortigʼi mazkur tarmoqda faoliyat yuritmoqda.
Natijalarni oʼtgan yil bilan qiyoslaydigan boʼlsak, respublikamizda xizmatlar sohasida oʼtgan yilning 9 oyida 42 mingta tadbirkorlik subʼektlari tashkil etilgan boʼlsa, joriy yilning shu davriga qadar 47 mingta tadbirkorlik subʼektlari tashkil etilgan. Natijada, respublikamizda 1 oktyabrь holatiga koʼra, xizmatlar sohasida faoliyat koʼrsatayotgan korxona va tashkilotlar soni 342 mingtaga yetdi.
Toshkent shahrida xizmatlar sohasini rivojlantirishda “Oʼzmilliybank” АJ maʼsul etib belgilangandan soʼng, amalga oshirilgan chora-tadbirlar natijasida quyidagilarga erishildi.
Jumladan, Toshkent shahrida 2023 yilning oʼtgan 9 oyida korxona va tashkilotlar tomonidan jami 133 trln. soʼmlik xizmatlar koʼrsatildi. Oʼtgan yilning mos davrida ushbu koʼrsatkich 102 trln.soʼmni, davriy oʼsish esa 117 foizni tashkil etdi.
Shuningdek, xizmatlar sohasida moliya, aloqa va axborotlashtirish, taʼlim va transport xizmatlaridagi oʼzgarishlar boshqa turdagi xizmatlarga nisbatan yuqori oʼsish boʼyicha natijalarni qayd etgan.
Toshkent shahrida xizmatlar sohasi xajmining jadal surʼatlar bilan oʼsishining kuzatilishini amalga oshirilgan ishlar hamda avvaldan belgilab olingan chora-tadbirlar natijasi sifatida koʼrish mumkin.
Taʼkidlash joiz, sohada yangi loyihalarni tashkil etish, faoliyatini kengaytirish hamda ularni moliyaviy qoʼllab-quvvatlash maqsadida “Oʼzmilliybank” АJ tijorat banklari bilan birgalikda 7,8 mingta tadbirkorlarga 19,1 trln.soʼmlik kredit mablagʼlar yoʼnaltirildi.
Buning natijasida, 2023 yil 1 sentyabrь holatiga koʼra, 13 mingta yangi tadbirkorlik subʼektlari tashkil etilib, ushbu sohada faoliyat yuritayotgan korxona va tashkilotlar soni 77 mingtaga yetdi.
Umuman olganda, bugungi kunda xizmatlar hajmi 2020 yilga nisbatan
2 barobarga oʼsganligini kuzatish mumkin.
Xulosa qilib aytganda, xizmatlar xajmining oʼtgan yillarga nisbatan jadal oʼsib borishi aholi jon boshiga koʼrsatilgan xizmatlar xajmining yuqori oʼsishiga hamda aholi daromadlarining koʼpayishiga omil boʼlmoqda.
Shu bilan birga, Toshkent shahrida 2023 yilda xizmatlar sohasini rivojlantirish orqali jumladan, yangi tadbirkorlarni joriy qilish, loyihalarni toʼliq ishga tushirilishi, mavjud tadbirkorlar faoliyatini yanada kengaytirish, korxonalar faoliyatini rasmiy sektorga oʼtkazilishini taʼminlash hamda soha yoʼnalishlarida fuqarolarni oʼzini oʼzi band qilish orqali jami 445 mingta ish oʼrinlarini yaratilishi boʼyicha chora-tadbirlar amalga oshirilmoqda.
Ushbu amalga oshirilgan chora-tadbirlar natijasida oʼtgan 9 oy davomida yuqorida koʼrsatib oʼtilgan yoʼnalishlar boʼyicha xizmatlar sohasida 393 mingta ish oʼrinlari tashkil etilganligi ijobiy natijalardan biridir.
Eng asosiysi, “O‘zmilliybank” AJ tomonidan xizmatlar sohasini rivojlantirish maqsadida sohadagi korxonalarni zamonaviy ko‘rinishga keltirish, yangi loyihalarni xorijiy tajribalar asosida joriy etish, ularni moliyaviy tarafdan qo‘llab-quvvatlash kabi tizimli islohotlar davom ettiriladi.
Binobarin, Toshkent shahrida joriy yil yakuni bilan:
xizmatlar xajmi 172,4 trln. so‘mga, o‘tgan yilga nisbatan 115 foizga,
2020-yilga nisbatan esa 2 barobarga oshishi kutilmoqda.
natijada aholi jon boshiga ko‘rsatilgan xizmatlar xajmi 2023-yil yakuni bilan 57 mln. so‘mga yetkazilib, 2022-yilga nisbatan 1,2 barobarga, 2020-yilga nisbatan 3 barobarga yetishi kutilmoqda.
Albatta, xizmatlar sohasini jadal rivojlantirish orqali hududlar iqtisodiy infrastrukturasi yaxshilash hamda aholi bandligini taʼminlash bilan bir qatorda, yangi xizmat turlarini joriy qilish, shuningdek xizmatlar hajmini hamda tadbirkorlik subyektlarining sonini oshishiga sabab bo‘lmoqda.
Bu orqali jamiyatimizning yashash tarzi yaxshilanib, ularning turmush darajasiga ijobiy taʼsir ko‘rsatish imkoniyatlar yaratilmoqda.
Reklama huquqi asosida.
Izoh (0)