Навоий, Самарқанд ва Фарғона вилоятларида ҳайдовчилик гувоҳномаларини ноқонуний йўл билан олиб беришини ваъда қилган шахслар ушланди. Бу ҳақда Бош прокуратура ҳузуридаги департамент хабар берди.
Қайд этилишича, департаментнинг Навоий вилоят бошқармаси томонидан тезкор тадбир ўтказилган. Тадбирда “А.в.” МЧЖ автомактаби раҳбари З.М. фуқаро Ш.Ж.нинг ишончига кириб, гўёки ЙҲХБда ишловчи танишлари ёрдамида Ш.Ж. ва унинг турмуш ўртоғига ҳайдовчилик гувоҳномаларини олиб бериши эвазига 1 000 долларни олган вақтида ашёвий далиллар билан ушланган.
Шу каби, департаментнинг Фарғона вилоят бошқармаси ИИБ ходимлари ҳамкорлигида ўтказилган тезкор тадбирда М.М. исмли шахс фуқаро А.Қ.га 1,3 минг доллар эвазига ўқув курсларига қатнашмасдан ҳайдовчилик гувоҳномасини олиб беришини ваъда қилиб, олдиндан 1 000 долларни олган вақтида ашёвий далиллар билан қўлга олинган.
Худди шундай, департаментнинг Самарқанд туман бўлими ва ИИБ ходимлари ҳамкорлигида ўтказилган тезкор тадбирда У.Т. ва Ш.А. исмли шахслар фуқаро М.А.га танишлари ёрдамида 1 000 доллар эвазига ҳайдовчилик гувоҳномасини олиб беришларини айтиб, шундан 500 долларни олган вақтларида ашёвий далиллар билан ушланган.
Мазкур ҳолатлар юзасидан Жиноят кодексининг 25, 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Бундан олдин Тошкент вилоятида сохта сертификат эвазига ҳайдовчилик гувоҳномаси олган фуқарога суд ҳукми ўқилганди. Унга Жиноят кодексининг 59-моддасига асосан тайинланган жазоларни қисман қўшиш йўли билан узил-кесил ўташ учун иш ҳақининг 20 фоизини давлат даромади ҳисобига ушлаб қолган ҳолда 2,5 йил муддатга ахлоқ тузатиш ишлари жазоси тайинланган. Май ўрталарида Фарғонада 200 долларга “права” олиб беришни ваъда қилган автомактаб раҳбари ушланганди.
Изоҳ (0)