Janob Rasul ijodi qanchalik tanqidlarga sabab bo‘lmasin, o‘zining tinglovchilari bor. U hamisha o‘ziga xos ijro uslubi bilan tinglovchilar eʼtiborini tortadi. Bu yil 36 yoshni qarshilagan ijodkor 13 yoshida sanʼatga kirib kelgan. Xo‘sh, o‘tgan vaqt mobaynida u nimalarga erishdi? Sanʼatkor bo‘lganidan afsuslangan paytlari ham bo‘lganmi?
“Bolaligim qiziq o‘tmagan”
— Bolaligim u qadar qiziq kechmagan. Hamma qatori oddiy bola bo‘lganman. Baliq tutishni va antennasi uzun radioda qo‘shiq tinglashni yaxshi ko‘rardim. Uni qulog‘imga qo‘yib, bir soatda bir beriladigan qo‘shiqni kutib o‘tirardim. Ungacha bir ayol tinmay gapirardi. “Qachon tugar ekan?” deb men ham uni eshitib o‘tiraverardim. Bolaligimda hindcha qo‘shiqlarni yaxshi ko‘rardim. Maktabda o‘qidim, undan keyin kollejga o‘qishga kirdim. Shu bilan katta bo‘lib qolganimni bilmay qoldim. Baʼzilarning bolaligiga o‘xshab, meniki unchalik qiziqarli bo‘lmagan, — deydi xonanda.
“Onam betob bo‘lgach, oilamiz qiynalib qolgan”
— Onam og‘ir kasallikka chalinganidan keyin, oilamiz ham ko‘p qiyinchilikka uchragan. Moddiy ehtiyojlar sabab, 13 yoshimdan to‘ylarga chiqqanman. Sanʼatkorlar choy ichib dam olishayotgan paytda “Mikrofonda ovozim qanday chiqar ekan?” deb baqirib tayoq yegan paytlarim ham bo‘lgan.
Yutuqlarimning zamirida onamning mehnati juda katta. U menga ishonch bag‘ishlagan va hamisha qo‘llab-quvvatlagan. “O‘g‘limning ovozi bor, yaxshi sanʼatkor bo‘lsa ko‘p pul topadi”, deb “Sevinch” guruhida qo‘shiq aytishimni istagan. Ammo ko‘p o‘tmay odamlar ust-boshingizga qarab muomala qilishini tushunib yetganman, — deydi xonanda.
“Meni negadir xushlashmagan”
— Nomini aytmayman, bir guruh yigitlari bilan to‘ylarga chiqardim. Ammo negadir xushlashmasdi. “Sen boraver, o‘zimiz bir amallaymiz”, deb to‘yga ketayotgan vaqtimizda yo‘lda tushirib qoldirishardi. Jamoa rahbarimizga esa “Rasulning ishi bor ekan, uyida qoldi”, deb yolg‘on gapirisharkan. Ustozim esa mendan ranjirdi. Keyin bilsam, ular men bilan birga xizmatlarga borishni istashmagan ekan. Chunki kiyimlarim juda oddiy bo‘lgan, oilaviy sharoitim sabab yangi kiyim olomasdik. Ammo yillar o‘tib, ular orasida eng qimmat kiyimni o‘zim kiyadigan bo‘ldim. Ammo hozir ulardan ranjimayman, balki to‘yga borolmay yig‘lab uyimga qaytganim motivatsiya bo‘lgandir, — deydi Janob Rasul.
“Guruh tarkibida kelajagimni ko‘rmadim”
— Onamning xohishi bilan “Sevinch” nomli guruhda qo‘shiq aytishni boshlaganman. Ustozimdan juda ko‘p narsalarni o‘rgandim. Ammo guruh tarkibida ijod qilib, kelajagimni ko‘rmadim. Shundan keyin ustozimning roziligi bilan yakkaxon ijod qilishni boshladim. Ammo 5 yil tashkiliy va moliyaviy jihatdan juda qiynaldim.
Guruh bilan ishlash qiyin. Eng katta kelishmovchilik puldan kelib chiqadi. Eng ahl guruhlar ham kun kelib, pul sabab ajraladi. Bir paytlar “Ummon” guruhidagi Jasurga shu haqida aytganimda “Yo‘q, biz avvaldan bir-birimizni taniymiz, bizda hech qanday kelishmovchilik bo‘lmaydi”, degandi. Oradan hech qancha vaqt o‘tmay Shohruh uylandi. Keyin guruh haqida gap-so‘zlar tarqaldi. Chunki uchta qo‘chqorning boshi bir qozonda qaynamaydi, — deydi xonanda Janob Rasul.
“Milliy qo‘shiqlarda omad kulmadi”
— Zamonaviy qo‘shiqlardan avval maqom, turk va hind ohangidagi qo‘shiqlarni ijro etdim. Hatto sof o‘zbekona klip ham suratga oldirganman. Ammo hech qanday natijaga erishmaganman.“90-60” klipi qancha tanqidlarga uchragan bo‘lsa ham, YouTubeda eng ko‘p ko‘rilgan kliplardan biri hisoblanadi. Uni nafaqat O‘zbekistonda, O‘rta Osiyo, Janubiy Koreya, Moskva va AQSHda ham tomosha qilishadi. Nazarimda dunyoga chiqib olmagunga qadar milliy qo‘shiqlar bilan ularning eʼtiborini tortib bo‘lmaydi. Shu bois o‘zbek sanʼatini xorijda targ‘ib qilishdan avval ularning nazariga tushish kerak, — deydi xonanda Janob Rasul.
“O‘ligim kimgadir kerak bo‘lgan”
— 2019-yili to‘ydan qaytayotganimizda juda g‘alati voqea sodir bo‘lgan. O‘shanda Alloh bizni bir o‘limdan saqlagan. Xullas, to‘ydan yaxshi kayfiyatda chiqib, Buxoroning “betonka” yo‘lida ketayotgandik. Bu yo‘l tekis bo‘lgani uchun mashinamiz 150-170 km tezlikda harakatlanardi. Birdan mashinamiz qattiq silkindi. Qo‘rqib, mashinani to‘xtatganmiz. Qarasak, orqa ballon qiyshayib qolgan va ballonni mustahkamlovchi 5 ta boltdan 3 tasi chiqib ketgan. Aslida u mashinaning ballonini bo‘shatish oson emasdi. Uni biladigan odam xizmatda ekanimizdan foydalanib shunday qilgan, deb gumon qilgandik. “Agar o‘sha ikkita bolt ham chiqib ketganida, mashina ag‘darilardi. Xudo sizlarni asrabdi”, deyishgan mashina ustalari. O‘ligimiz kimgadir kerak bo‘lgan, — deydi xonanda Janob Rasul.
“Bitta klipga 30 ming AQSH dollari sarflaganman”
— Men o‘zimni qimmat pulga klip oldiradigan xonanda deb bilmayman. Chunki Yevropada suratga olinayotgan kliplarni ham kuzatib boraman. Bizda ulardek 300-400 ming AQSH dollari sarflanadigan kliplar olinmaydi. Mening eng qimmat klipim “90-60” qo‘shig‘iga olingan. Unga umumiy hisobda 30 ming AQSH dollari sarflaganman. Chunki O‘zbekistondan Dubayga 11 kishi borganmiz, mehmonxona xarajatlaridan tashqari, u yerdan ikkita operator yollaganmiz. Bundan tashqari, Dubay shahrida klip suratga olish uchun ham alohida pul to‘lanishi kerak ekan. Shuning uchun ham bu qo‘shiqning klipi menga ancha qimmatga tushgan, — deydi xonanda Janob Rasul.
“Bitta to‘ydan 15 ming AQSH dollari daromad topganman”
— Ko‘pchilik meni qimmat xonanda deb biladi. Ammo men bunday deb o‘ylamayman. Yulduz Usmonova va Munisa Rizayevalar mendan ham qimmatga xizmatlarga boradi. To‘ydagi gonorarim qancha ekanini esa ochiq aytolmayman. Buning sababi xizmat narxlari viloyatning uzoq-yaqinligi bilan ham bog‘liq. Xorij mashinasida yuraman. U ancha ko‘p benzin yeydi. To‘yda fonogrammadan foydalanmayman. Shuning uchun yonimda bir nechta yigitlar bo‘ladi. Agar hozir xizmat haqqini aytsam, ertaga muammo yuzaga kelishi mumkin. Ammo yaqinda Tojikistonga bir soatlik xizmatga bordim. Buning uchun 15 ming AQSH dollari oldim. Bu shu kungacha bitta to‘ydan olgan eng ko‘p xizmat haqim bo‘ldi, — deydi xonanda Janob Rasul.
“To‘rt qavatli uyim”
— Uy-joyim, mashinam haqidagi maʼlumotlarni hech qachon yashirmayman. Chunki bularni faqat xalqning oldida qo‘lga kiritdim va o‘g‘irlik qilganim, birovning haqqiga xiyonat qilganim yo‘q.
Beruniy tumanida 30 sotixli maydonga 4 qavatli uy qurganman. Bu uyning rejasini bundan 12 yil avval chizgandim. Ishonasizmi, o‘shanda bitta velosipedim ham bo‘lmagan. Yaxshi niyat qilib, katta uy qurishni rejalashtirgandim. Uyga lift ham o‘rnatdik. Hovlida kichik issiqxona va ferma ham bor. Bolaligimdan shunday narsalarga qiziqaman.
Nasib qilsa, keksayganda nabiralarning shovqinidan qochib, ayolim bilan o‘sha issiqxonada suhbatlashib o‘tiramiz. Hali bitmagan uyimga hozircha 400 ming AQSH dollari sarfladik. Menda hammasi hisob-kitobli, qayerdan qancha pul olganimni va qancha sarflaganimni hisoblab, arxiv qilib qo‘yaman. Agar topganimni hisob-kitob qilsam, aslida to‘rt qavatli uy emas, aeroport qurishim kerak edi. Ammo yonimdagi yigitlarning ulushi va ijodning ham o‘ziga yarasha katta xarajati bor, — deydi xonanda Janob Rasul.
“To‘rt farzandim bor”
— Shukrki, ikki o‘g‘il va ikki qiz farzandim bor. Baʼzan ular Instagramdagi jonli efirlarda ko‘rinib qolishadi, ammo atayin ularni ommaga ko‘rsatmayman.
O‘g‘illarim yaxshi inson bo‘lib ulg‘ayishlarini va otalari singari sanʼatkor bo‘lishlarini orzu qilaman. Shuning uchun ham hozircha ularning yuzini ommaga tanitmay yuribman. Ulg‘aygach, yaxshi qo‘shiq ijro etib xalqqa ko‘ringani boshqacha. Kichkinaligidan qo‘shiq aytib chiqsa, ulg‘ayganda ham odamlarning tasavvurida kichkina bolacha bo‘lib qolib ketadi. Shuning uchun ham hozir o‘g‘illarimga qo‘shiq ham ayttirmayman, bolalik gashtini sursin, deyapman. 7-8 yoshidan keyin ijodni o‘rganishni boshlaydi.
Ko‘pchilik farzandlarini olib kelib, shogirdlikka olib, klip chiqarib bering, deb so‘rashadi. Hozir klip olib, televideniyega ham chiqardingiz deylik, ammo 17 yoshga to‘lganida nima qilasiz, deyman. Chunki u bola endi xalq uchun qiziq bo‘lmay qoladi, avval ko‘rganman-ku, eshitganman-ku, deyishadi.
Agar o‘g‘illarim kun kelib sanʼatkor bo‘laman deb jiddiy ahd qilsa, albatta, yordam beraman. Aslida hozir ham imkoniyat bor. Konsertimda duet aytib chiqsa ham bo‘ladi. Chunki to‘ng‘ich o‘g‘limning chiroyli ovozi bor. Ammo uning ijodini hech kim jiddiy qabul qilmaydi. Bolaga baribir boladek munosabatda bo‘lishadi, — deydi xonanda Janob Rasul.
Izoh (0)