Robert De Niro 70-yillardan beri eng mashhur aktyorlar ro‘yxatidan tushmaydi. Bir paytlar The Guardian nashri u “Leonardo Di Kaprio, Bred Pitt va Deniel Day-Lyuis kabi zamonaviy yulduzlarni ortda qoldirishi mumkin” deb yozgandi. Aktyorning hayotida siz bilmagan qiziqarli daqiqalar ko‘p bo‘lgan.
Rassomlarning o‘g‘li
Robert De Niro 1943-yil 17-avgustda Nyu-Yorkda tug‘ilgan. U rassom otasining nomi bilan atalgan, onasi Virjiniya ham suratlar chizgan. 1945-yilda Robertning ota-onasi ajrashadi va bola onasida qoladi. U ko‘plab ijodkorlar bilan muloqotda bo‘lgani uchun kichkina Bobbining san’at asoslarini o‘rganishdan boshqa iloji qolmaydi.
10 yoshida u mahalliy spektakl “Oz sehrgari”da Qo‘rqoq sher rolini o‘ynaydi va o‘zini yosh aktyor sifatida ko‘rsatadi. Maktabdan so‘ng Oliy musiqa, san’at va ijro maktabida tahsilni davom ettiradi. O‘qituvchilaridan u Stanislavskiy ta’limini olgan — De Niro hozirgacha detallarga e’tibor berib, ehtiyotkorlik bilan munosabatda bo‘lishi bilan tanilgan.
Haqiqiy taksi haydovchisi
Robert “Taksichi” (1976) filmidagi bosh rolga tasdiqlanganida, u bir necha hafta davomida 12 soatlik smenada Nyu-York ko‘chalarida taksichilik qiladi. Aktyor mazkur roli uchun “Oskar” mukofotiga nomzod bo‘lgan. Aytgancha, u ikki marta “Oskar” bilan mukofotlangan: “Cho‘qintirgan ota” va “Quturgan buqa” filmidagi rollari uchun.
“Quturgan buqa” filmidagi roli uchun Robert bir necha oy ichida fastfudlar yordamida deyarli 30 kiloga semiradi. Suratga olish ishlari tugagandan so‘ng, u darhol vazn tashlaydi.
De Niro har bir filmda qahramoning hayotini yashab o‘tadi. Eng yorqin misol Skorsezening “Qo‘rquv ko‘rfazi” (1991) filmidagi bosh roldir. Roli uchun aktyor 5000 dollarga tishlarini charxlatib tashlagan, holbuki grim yordamida buni qilish mumkin edi. “Men har doim qahramonga singib ketish uchun tananing mumkin bo‘lgan xususiyatlaridan foydalanish kerakligini aytaman”, deydi aktyor bu qaroriga javoban. Tasvirga olish ishlari tugagach, tish shifokoriga 20 ming dollar to‘lab, tishlarini davolatadi. Natijada De Niro yana bir “Oskar” nominatsiyasini oladi.
Deyarli italyan
De Nironing ajdodlari Amerikaga Italiyadan ko‘chib kelishgan. Aytgancha, familiyasidagi “di” qo‘shimchasi hujjatlardagi xato tufayli “de”ga aylanib ketagan.
2004-yilda aktyorlik xizmatlari uchun unga Italiya fuqaroligini berish haqida gap ketganda, Amerikaning “Italiya o‘g‘illari” jamiyati bunga keskin qarshi chiqishadi. Aytishlaricha, aktyor doimiy ravishda italyan gangsterlarini o‘ynaydi va filmlarda mamlakatning noto‘g‘ri obrazini yaratadi. De Nironing o‘zi boshqacha fikrda: “Men o‘ynagan rollar hayotdagi real odamlar. Ular bor, demak, ular boshqalar kabi ekranda paydo bo‘lish huquqiga ega”. Oxir-oqibat unga fuqarolik beriladi.
Faqatgina suratga olish maydonchasida emas
De Niro faol suratga tushishda davom etmoqda: masalan, o‘tgan yili u “Irlandiyalik” filmida bosh rolni va “Joker” filmida ikkinchi darajali rolni o‘ynadi. Ikkala film ham ko‘plab mukofotlarga sazovor bo‘lgan.
Kinodan tashqari Nironing bizneslari ham bor. 1994-yilda De Niro Nobu restoranlar tarmog‘iga asos solgan va bugungi kunga qadar dunyoda ulardan 38 tasi va 8 ta mehmonxona mavjud.
Biroq aktyorning boyligiga uning ikkinchi xotini Greys Xaytauer katta zarar yetkazadi. Ular 1997-yilda turmush qurishadi, besh yildan so‘ng ajrashmoqchi bo‘lishadi, lekin qarorlarini o‘zgartirishadi. 2018-yil oxirida Robert va Greys ajrashadi, biroq rasmiy ajralish hali berilmagan.
Er-xotinga yaqin manbalarga ko‘ra, asosiy muammo Greysning hamma narsaga pul sarflash istagida. Ikkinchisi, ularning to‘ng‘ich o‘g‘li 21 yoshli Eliotda autizm spektrining buzilishi tashxisi qo‘yilgan. Aytgancha, Robertning uchta ayoldan jami besh nafar farzandi bor.
Izoh (0)