Qashqadaryo viloyatida faoliyat yurituvchi 2 ta metan zapravka gaz yetkazib berish to‘xtatilgani bois faoliyatini vaqtincha tugatdi. Bu haqda “Daryo”ga murojaat qilgan tadbirkorga ko‘ra, uning 50 nafarga yaqin ishchisi ayni paytda ishsiz qolgan.
Tadbirkorning aytishicha, zapravka 2024-yilning 3-aprel kunidan beri ishlamayapti.
Qarshi—Beshkent yo‘lidagi “E’zoz gaz-1” va “E’zoz metan servis” MCHJlarga qarashli gaz zapravkalarga metan gaz yetkazib berish to‘xtatilgani sabab zapravka yopib qo‘yilgan. Aynan bitta zapravka ishlamayotgani sabab bu yerda 21 kishi ishsiz qolib ketgan. Bizga amaliy yordam berishingizni so‘raymiz, — deydi tahririyatga videomurojaat qilgan tadbirkor Xurshid Yangiboyev.
Murojaatchining aytishicha, uning ta’sischiligidagi va rahbarligidagi zapravkalar faoliyatining to‘xtab qolishi 50 nafarga yaqin ishchining ishsiz qolishiga sabab bo‘lmoqda.
Bizga gaz yetkazib bermasliklari uchun hech qanday sabab yo‘q. Shartnomamiz bor, biroq mas’ul tashkilotlar shartnoma shartlarini bajarmayapti, — deydi u.
Tadbirkorning aytishicha, u bu muammo yuzasidan viloyat hokimiga ham murojaat qilgan. Biroq natijaga erishmagan.
Nima uchun yopildik, gaz yetkazib bermaslik sababi nima, degan savolimizga javob topolmayapmiz, — deydi tadbirkor.
Bildirishicha, 2024-yilning 3-aprel kuni “Hududgazta’minot” AJ vakillaridan iborat ishchi guruh tekshiruvidan so‘ng, zapravkalarda shunday holat yuzaga kelgan.
Tekshiruv qilishdi. Ammo hech qanday aybimiz chiqmadi. Muammo topilmadi. Shunga qaramasdan, bizga gaz yetkazib berish to‘xtatilgan. Bormagan joyimiz, murojaat qilmagan tashkilotimiz qolmadi, — deydi tadbirkor.
“Hududgazta’minot” AJ axborot xizmatining ayni kundagi mas’uli Dilorom Jumaniyozova “Daryo”ning bu haqdagi savoliga javob berar ekan, holat Bosh prokuratura tomonidan o‘rganilayotganini ma’lum qildi.
Gaz ta’minoti korxonasining “E’zoz gaz-1” va “E’zoz metan servis” MCHJlar bilan tuzgan shartnomalarining 6,1-bandida qayd etilgan holatlar kuzatilgani bois AGTKSH gaz tarmog‘idan uzib qo‘yilgan. Vazirlar Mahkamasining 2017-yildagi “O‘zbekiston Respublikasi Bosh prokuraturasi huzuridagi Majburiy ijro byurosining elektr energiyasi va tabiiy gaz yetkazib beruvchilar bilan o‘zaro hamkorlik qilish hamda iste’molchilarni elektr energiyasi va gaz tarmoqlaridan uzib qo‘yish tartibi to‘g‘risidagi nizomlarni tasdiqlash haqida”gi qarorining 3-bob 21-bandiga asosan elektr energiyasi va tabiiy gaz xizmatlaridan foydalanish qoidalari buzilganligi uchun iste’molchilar tarmoqdan uzilganda, ularni tarmoqqa qayta ulash Byuro tomonidan elektr energiyasi va tabiiy gaz xizmatlaridan foydalanish qoidalarini buzish sabablari hamda sharoitlari bartaraf etilganligi nuqtai nazaridan iste’molchilarning binolari ko‘zdan kechirilgandan keyin amalga oshiriladi. Ayni vaqtda Bosh prokuratura tomonidan o‘rganish ishlari olib borilmoqda. O‘rganish ishlari to‘liq yakunlanganidan keyin to‘liq ma’lumot taqdim etiladi”, — deydi Dilorom Jumaniyozova.
Dilorom Jumaniyozovaga ko‘ra, metan gaz faoliyati tekshirilganda noqonuniy holat aniqlangan. Shu sabab ayni paytda o‘rganish ishlari olib borilmoqda.
Mas’ul jurnalistning “Bu haqda tadbirkorning o‘ziga xabar berilganmi? Ya’ni tadbirkorga gaz yetkazib berishni to‘xtatish uchun asos borligi aytilganmi? Ertaga nega asossiz shartnoma shartlari bajarilmagan, degan savol berilsa, javob berishda qiynalib qolmaysizlarmi?” degan savoliga “yo‘q, albatta, barchasi qonuniy”, deb javob qaytardi.
“Daryo” jurnalisti Bosh prokuratura axborot xizmati bilan ham bog‘lanib, tadbirkorni qiynayotgan muammo haqida bildirdi va “Hududgazta’minot” AJ axborot xizmatining tadbirkor ishi Bosh prokuratura tomonidan o‘rganilayotgani haqidagi axborotiga aniqlik kiritishga urindi. Hayot Shamsutdinov holat yuzasidan tez orada batafsil ma’lumot berilishini bildirdi.
“Daryo” mavzuga qaytadi.
Izoh (0)