Қашқадарё вилоятида фаолият юритувчи 2 та метан заправка газ етказиб бериш тўхтатилгани боис фаолиятини вақтинча тугатди. Бу ҳақда “Дарё”га мурожаат қилган тадбиркорга кўра, унинг 50 нафарга яқин ишчиси айни пайтда ишсиз қолган.
Тадбиркорнинг айтишича, заправка 2024 йилнинг 3 апрель кунидан бери ишламаяпти.
Қарши—Бешкент йўлидаги “Эъзоз газ-1” ва “Эъзоз метан сервис” МЧЖларга қарашли газ заправкаларга метан газ етказиб бериш тўхтатилгани сабаб заправка ёпиб қўйилган. Айнан битта заправка ишламаётгани сабаб бу ерда 21 киши ишсиз қолиб кетган. Бизга амалий ёрдам беришингизни сўраймиз, — дейди таҳририятга видеомурожаат қилган тадбиркор Хуршид Янгибоев.
Мурожаатчининг айтишича, унинг таъсисчилигидаги ва раҳбарлигидаги заправкалар фаолиятининг тўхтаб қолиши 50 нафарга яқин ишчининг ишсиз қолишига сабаб бўлмоқда.
Бизга газ етказиб бермасликлари учун ҳеч қандай сабаб йўқ. Шартномамиз бор, бироқ масъул ташкилотлар шартнома шартларини бажармаяпти, — дейди у.
Тадбиркорнинг айтишича, у бу муаммо юзасидан вилоят ҳокимига ҳам мурожаат қилган. Бироқ натижага эришмаган.
Нима учун ёпилдик, газ етказиб бермаслик сабаби нима, деган саволимизга жавоб тополмаяпмиз, — дейди тадбиркор.
Билдиришича, 2024 йилнинг 3 апрель куни “Ҳудудгазтаъминот” АЖ вакилларидан иборат ишчи гуруҳ текширувидан сўнг, заправкаларда шундай ҳолат юзага келган.
Текширув қилишди. Аммо ҳеч қандай айбимиз чиқмади. Муаммо топилмади. Шунга қарамасдан, бизга газ етказиб бериш тўхтатилган. Бормаган жойимиз, мурожаат қилмаган ташкилотимиз қолмади, — дейди тадбиркор.
“Ҳудудгазтаъминот” АЖ ахборот хизматининг айни кундаги масъули Дилором Жуманиёзова “Дарё”нинг бу ҳақдаги саволига жавоб берар экан, ҳолат Бош прокуратура томонидан ўрганилаётганини маълум қилди.
Газ таъминоти корхонасининг “Эъзоз газ-1” ва “Эъзоз метан сервис” МЧЖлар билан тузган шартномаларининг 6,1-бандида қайд этилган ҳолатлар кузатилгани боис АГТКШ газ тармоғидан узиб қўйилган. Вазирлар Маҳкамасининг 2017 йилдаги “Ўзбекистон Республикаси Бош прокуратураси ҳузуридаги Мажбурий ижро бюросининг электр энергияси ва табиий газ етказиб берувчилар билан ўзаро ҳамкорлик қилиш ҳамда истеъмолчиларни электр энергияси ва газ тармоқларидан узиб қўйиш тартиби тўғрисидаги низомларни тасдиқлаш ҳақида”ги қарорининг 3-боб 21-бандига асосан электр энергияси ва табиий газ хизматларидан фойдаланиш қоидалари бузилганлиги учун истеъмолчилар тармоқдан узилганда, уларни тармоққа қайта улаш Бюро томонидан электр энергияси ва табиий газ хизматларидан фойдаланиш қоидаларини бузиш сабаблари ҳамда шароитлари бартараф этилганлиги нуқтаи назаридан истеъмолчиларнинг бинолари кўздан кечирилгандан кейин амалга оширилади. Айни вақтда Бош прокуратура томонидан ўрганиш ишлари олиб борилмоқда. Ўрганиш ишлари тўлиқ якунланганидан кейин тўлиқ маълумот тақдим этилади”, — дейди Дилором Жуманиёзова.
Дилором Жуманиёзовага кўра, метан газ фаолияти текширилганда ноқонуний ҳолат аниқланган. Шу сабаб айни пайтда ўрганиш ишлари олиб борилмоқда.
Масъул журналистнинг “Бу ҳақда тадбиркорнинг ўзига хабар берилганми? Яъни тадбиркорга газ етказиб беришни тўхтатиш учун асос борлиги айтилганми? Эртага нега асоссиз шартнома шартлари бажарилмаган, деган савол берилса, жавоб беришда қийналиб қолмайсизларми?” деган саволига “йўқ, албатта, барчаси қонуний”, деб жавоб қайтарди.
“Дарё” журналисти Бош прокуратура ахборот хизмати билан ҳам боғланиб, тадбиркорни қийнаётган муаммо ҳақида билдирди ва “Ҳудудгазтаъминот” АЖ ахборот хизматининг тадбиркор иши Бош прокуратура томонидан ўрганилаётгани ҳақидаги ахборотига аниқлик киритишга уринди. Ҳаёт Шамсутдинов ҳолат юзасидан тез орада батафсил маълумот берилишини билдирди.
“Дарё” мавзуга қайтади.
Изоҳ (0)