Mamlakatda oxirgi 5 oyda Cobalt va Damas avtomobillari eng ko‘p ishlab chiqarilgan. Bu haqda Statistika agentligi maʼlumot berdi.
Qayd etilishicha, 2024-yil yanvar–may oylarida O‘zbekistonda 146 640 ta yengil avtomobillar ishlab chiqarilgan. Mazkur ko‘rsatkich 2023-yilning mos davrida 120 631 dona bo‘lgan.
Besh oy ichida respublikada 57 542 dona Cobalt (2023-yil mos davridagidan 46,6 foiz ko‘p) ishlab chiqarildi va avtomobil bir necha yildan beri son jihatdan eng yuqori pog‘onani saqlab kelmoqda.
Hisobot davrida 31 239 dona Damas (o‘tgan yil mos davridagidan 16,5 foiz ko‘p), 19 279 dona Tracker (2,2 martaga ortdi), 14 905 dona Onix (2,1 martaga ko‘p), 11 913 dona Lacetti-Gentra (57,4 foizga kamaydi) ishlab chiqarildi.
Shu bilan birga, yanvar–may oylarida 4 000 dona Chery (45,3 foiz oshdi), 7 433 dona KIA (28,9 foizga oshdi), 93 dona Exeed va 230 dona Haval avtomobillari ishlab chiqarilgan.
Avvalroq UzAutoMotors 2023-yilda Chevrolet avtomobillari sotuvi bo‘yicha dunyoda ikkinchi o‘rinni egallagani xabar qilingandi. Kompaniya yil davomida 370 ming dona Chevrolet brendi ostidagi avtomobillar sotganini ochiqlagan.
Bugun, 21-iyun kuni kompaniya sotilishi rejalashtirilgan 25 000 dona Chevrolet Cobalt avtomobilining 23 577 tasiga shartnoma tuzilgani haqida xabar berdi. Qayd etilishicha, mazkur shartnomalar 2024-yilgi ishlab chiqarish hajmi uchun rasmiylashtirilmoqda.
Izoh (0)