O‘zbekistonning 2024-yil yanvar–may oylaridagi tashqi savdo aylanmasi hajmi 26,7 milliard dollariga yetdi. Bu 2023-yilning mos davriga nisbatan 769,5 million dollarga (3 foiz) ko‘p.
Statistika agentligi tahliliga ko‘ra, besh oy davomida mamlakat 10,8 milliard dollarlik tovar va xizmatlar eksport qilgan (2023-yil mos davridagidan 1,9 foiz ko‘p). Import hajmi esa 15,9 milliard dollarni (3,7 foiz ko‘p) tashkil etgan. Hisobot davrida manfiy tashqi savdo balansi 5 milliard dollar qiymatida qayd etildi.
Respublika tashqi savdosining asosiy ulushi Xitoy (18,9 foiz), Rossiya (17,9 foiz), Qozog‘iston (5,9 foiz), Turkiya (4,5 foiz) va Koreya (3,4 foiz) mamlakatlari hissasiga to‘g‘ri kelmoqda.
Hisobot davrida O‘zbekistonning MDH davlatlari bilan savdo aylanmasi hajmi 8,9 milliard dollarni (2023-yil mos davriga nisbatan 0,6 foiz o‘sish) tashkil etdi. Shundan eksport 3,1 milliard dollar, import hajmi 5,7 milliard dollar bo‘ldi.
Eksport hajmi va uning tarkibi
Mamlakatning yanvar–may oylari davomidagi eksportidan tushgan mablag‘larning qariyb 38,6 foizi oltin hissasiga to‘g‘ri kelgan. Mazkur davrda 4,2 milliard dollarlik oltin sotilgan. Shuningdek, sanoat tovarlari eksporti 1,7 milliard dollarni, xizmatlar eksporti 2,2 milliard dollarni tashkil etdi.
Eksport tarkibida 629,2 million dollarli oziq-ovqat mahsulotlari va tirik hayvonlar, 613 million dollarlik kimyoviy vositalar va shunga o‘xshash mahsulotlar bor. Yana 499,6 million dollarlik mashinalar va transport asbob-uskunalari ham eksport qilingan.
O‘zbekiston besh oy ichida 228,7 million dollarlik neft va neft mahsulotlari, 59,9 million dollarlik gaz, 55,4 million dollarlik elektr toki eksport qildi.
Hisobot davrida mamlakat Afg‘oniston, Fransiya va Rossiya davlatlariga eksport hajmini oshirganini ko‘rish mumkin.
Import hajmi va uning tarkibi
Joriy yil yanvar–may oylarida O‘zbekiston 15,9 milliard dollarlik tovar va xizmatlar import qildi (2023-yil mos davridagidan 3,7 foiz o‘sdi).
Import tarkibidagi eng katta ulush mashinalar va transport asbob-uskunalari (37,3 foiz), sanoat tovarlari (15,2 foiz) hamda kimyoviy vositalar va shunga o‘xshash mahsulotlar (12,3 foiz) hisobiga to‘g‘ri kelgan.
Xususan, besh oy davomida 5,9 milliard dollarlik mashinalar va transport asbob uskunalari, 2,4 milliard dollarlik sanoat tovarlari, 1,4 milliard dollarlik oziq-ovqat mahsulotlari va tirik hayvonlar import qilingan.
Hisobot davrida O‘zbekiston xorijiy davlatlardan 975,2 million dollarlik neft, 643,2 million dollarlik gaz, 72,2 million dollarlik elektr toki import qilgan.
Respublika Xitoy, Rossiya, Turkmaniston, Hindiston va AQSH mamlakatlaridan tovar va xizmatlar importi hajmini sezilarli oshirgan.
Izoh (0)