Мамлакатда охирги 5 ойда Cobalt ва Damas автомобиллари энг кўп ишлаб чиқарилган. Бу ҳақда Статистика агентлиги маълумот берди.
Қайд этилишича, 2024 йил январь–май ойларида Ўзбекистонда 146 640 та енгил автомобиллар ишлаб чиқарилган. Мазкур кўрсаткич 2023 йилнинг мос даврида 120 631 дона бўлган.
Беш ой ичида республикада 57 542 дона Cobalt (2023 йил мос давридагидан 46,6 фоиз кўп) ишлаб чиқарилди ва автомобиль бир неча йилдан бери сон жиҳатдан энг юқори поғонани сақлаб келмоқда.
Ҳисобот даврида 31 239 дона Damas (ўтган йил мос давридагидан 16,5 фоиз кўп), 19 279 дона Tracker (2,2 мартага ортди), 14 905 дона Onix (2,1 мартага кўп), 11 913 дона Lacetti-Gentra (57,4 фоизга камайди) ишлаб чиқарилди.
Шу билан бирга, январь–май ойларида 4 000 дона Chery (45,3 фоиз ошди), 7 433 дона KIA (28,9 фоизга ошди), 93 дона Exeed ва 230 дона Haval автомобиллари ишлаб чиқарилган.
Аввалроқ UzAutoMotors 2023 йилда Chevrolet автомобиллари сотуви бўйича дунёда иккинчи ўринни эгаллагани хабар қилинганди. Компания йил давомида 370 минг дона Chevrolet бренди остидаги автомобиллар сотганини очиқлаган.
Бугун, 21 июнь куни компания сотилиши режалаштирилган 25 000 дона Chevrolet Cobalt автомобилининг 23 577 тасига шартнома тузилгани ҳақида хабар берди. Қайд этилишича, мазкур шартномалар 2024 йилги ишлаб чиқариш ҳажми учун расмийлаштирилмоқда.
Изоҳ (0)