“Koreya katta urushni boshidan o‘tkazgan, xarobalar va iqtisodiy muammolar ostida qolgandi” — Koreya elitasi mamlakat rivojini nimalar bilan bog‘laydi?

Koreya Respublikasi prezidenti Yun Sok Yolning O‘zbekistonga tashrifida mamlakat ishbilarmon doira vakillari o‘zbekistonlik hamkasblari bilan uchrashib, hamkorlik qilish masalasini muhokama qilishdi. “Menimcha” ko‘rsatuvi muxbiri ularning bir nechasidan Koreyaning dunyoda rivojlangan mamlakatlar qatoriga kirishida qanday omillar sabab bo‘lgani haqida fikrlarini oldi.

“Xan daryosidagi mo‘jiza” — Koreya iqtisodiy mo‘jizasini koreyaliklarning o‘zi shunday ataydi. O‘zbekiston ham bu mo‘jizaga erishishi uchun ishni nimadan boshlash kerak?

Park Iljun, Koreya savdo-sanoat palatasi raisi o‘rinbosari:

Oxir-oqibat hammasi odamlarga bog‘liq. O‘ylaymanki, shuning uchun inson kapitaliga, ularni o‘qitish va rivojlantirishga kuch berish kerak.

Kang Sogun, Korea development banki ijrochi direktori:

Iqtisodiy o‘sish uchun yo‘llar, elektr energiya, ijtimoiy va jamoat kapitaliga e’tibor berish juda muhim, deb bilaman.

Park Vonchol, SKC kompaniyasi bosh ijrochi direktori:

Koreyada resurslar yetarli emas. Xan daryosidagi mo‘jizaga davlat siyosati, ishchi kuchi va texnologiyalar yordamida yetib borilgan. Mening fikrimcha, O‘zbekiston Koreya bilan taqqoslaganda iqtisodiy mo‘jizaga yetishi uchun yaxshiroq sharoitga ega. Transport, infratuzilma, universitetlar orqali kadrlarni tayyorlash masalasi ustuvor bo‘lishi lozim.

Park Sunho, International contractiors association kompaniyasi rahbari:

1950-yillarda Koreya katta urushni boshidan o‘tkazgan, xarobalar va iqtisodiy muammolar ostida qolgandi. Lekin xalqimizning ta’lim olishga va vaziyatni o‘zgartirishga bo‘lgan intilishi yuqori edi. Yana shuni tushundikki, infratuzilmani yaxshilash hammasini hal qiladi.