“Mahallalar faoliyatini tartibga solishga doir normativ-huquqiy hujjatlarni tasdiqlash to‘g‘risida”gi hukumat qarori qabul qilindi va kuchga kirdi.
Hujjat bilan jamoatchilikni mahalla yettiligi a’zolari tomonidan amalga oshirilayotgan ishlar to‘g‘risida xabardor qilish tartibi tasdiqlandi.
Nizom mahalla yettiligi a’zolari — mahalla raisi, hokim yordamchisi, yoshlar yetakchisi, xotin-qizlar faoli, profilaktika inspektori, ijtimoiy xodim va soliq inspektori tomonidan amalga oshirilgan ishlar bo‘yicha mahalla fuqarolar yig‘ini oldida har chorakda hisobot berish tartibini belgilaydi.
Yettilikning har bir a’zosi o‘z faoliyatining barcha yo‘nalishlari bo‘yicha batafsil hisobot beradi. Hisobot fuqarolar yig‘inida har chorak yakuni bo‘yicha keyingi oyning 10-sanasigacha eshitiladi. Hisobot berishda qonunchilik hujjatlariga muvofiq qo‘riqlanadigan davlat, xizmat va soliq sirlarining muhofaza qilinishi hamda fuqarolarning shaxsiy va oilaviy sirlarining daxsliszligi ta’minlanadi.
Xususan, fuqarolar yig‘ini raisi fuqarolar yig‘ini oldida quyidagi yo‘nalishlar bo‘yicha hisobot beradi:
- fuqarolar yig‘ini tomonidan qabul qilingan qarorlar ijrosi;
- mahallada ijtimoiy-ma’naviy muhitni sog‘lomlashtirish va ijtimoiy-iqtisodiy ahvolni yaxshilash, shu jumladan, mahalla obodligini saqlash hamda infratuzilmani rivojlantirish;
- maslahat markazlari faoliyatini tashkil etish;
- kam ta’minlangan oilalar, yetim bolalar, ota-onasi qaramog‘idan mahrum bo‘lgan bolalar, shuningdek, favqulodda vaziyatlardan jabr ko‘rgan fuqarolarga yordam ko‘rsatish;
- mahalla yettiligining kollegial qarorlari asosida ko‘rsatilgan ijtimoiy yordam va ajratilgan subsidiyalar;
- keksalar muammolarini manzilli o‘rganish, ularni moddiy ca ijtimoiy qo‘llab-quvvatlash;
- bayram kunlari va muhim sanalar bilan bog‘liq ommaviy tadbirlar o‘tkazilishini tashkil qilish va boshqalar.
Ko‘chaboshi va uyboshilar faoliyatini tashkil etish tartibi to‘g‘risidagi namunaviy nizom ham tasdiqlandi. U ko‘chaboshi va uyboshi saylovini tashkil etish va o‘tkazish tartibi, ularning asosiy vazifalari va funksiyalari, faoliyatini tashkil etish tartibini belgilaydi.
Ko‘chaboshi va uyboshilar saylovi tegishli hududda doimiy yoki vaqtincha istiqomat qilayotgan fuqarolarning fuqarolar yig‘ini raisi rahbarligidagi yig‘ilishda ochiq ovoz berish orqali o‘tkaziladi.
Izoh (0)