“Корея катта урушни бошидан ўтказган, харобалар ва иқтисодий муаммолар остида қолганди” — Корея элитаси мамлакат ривожини нималар билан боғлайди?

Корея Республикаси президенти Юн Сок Ёлнинг Ўзбекистонга ташрифида мамлакат ишбилармон доира вакиллари ўзбекистонлик ҳамкасблари билан учрашиб, ҳамкорлик қилиш масаласини муҳокама қилишди. “Менимча” кўрсатуви мухбири уларнинг бир нечасидан Кореянинг дунёда ривожланган мамлакатлар қаторига киришида қандай омиллар сабаб бўлгани ҳақида фикрларини олди.

“Хан дарёсидаги мўжиза” — Корея иқтисодий мўжизасини кореяликларнинг ўзи шундай атайди. Ўзбекистон ҳам бу мўжизага эришиши учун ишни нимадан бошлаш керак?

Парк Илжун, Корея савдо-саноат палатаси раиси ўринбосари:

Охир-оқибат ҳаммаси одамларга боғлиқ. Ўйлайманки, шунинг учун инсон капиталига, уларни ўқитиш ва ривожлантиришга куч бериш керак.

Канг Согун, Korea development банки ижрочи директори:

Иқтисодий ўсиш учун йўллар, электр энергия, ижтимоий ва жамоат капиталига эътибор бериш жуда муҳим, деб биламан.

Парк Вончол, SKC компанияси бош ижрочи директори:

Кореяда ресурслар етарли эмас. Хан дарёсидаги мўжизага давлат сиёсати, ишчи кучи ва технологиялар ёрдамида етиб борилган. Менинг фикримча, Ўзбекистон Корея билан таққослаганда иқтисодий мўжизага етиши учун яхшироқ шароитга эга. Транспорт, инфратузилма, университетлар орқали кадрларни тайёрлаш масаласи устувор бўлиши лозим.

Парк Сунҳо, International contractiors association компанияси раҳбари:

1950 йилларда Корея катта урушни бошидан ўтказган, харобалар ва иқтисодий муаммолар остида қолганди. Лекин халқимизнинг таълим олишга ва вазиятни ўзгартиришга бўлган интилиши юқори эди. Яна шуни тушундикки, инфратузилмани яхшилаш ҳаммасини ҳал қилади.