AQSH harbiylari 19-iyun kuni Suriyada maxsus operatsiya o‘tkazib, ISHID qo‘mondonini yo‘q qilgan. Bu haqda Al Arabiya nashri xabar berdi.
Manbada aytilishicha, chorshanba kuni AQSH Markaziy qo‘mondonligi buyrug‘i bilan Suriyaning qator hududlarida havo hujumlari amalga oshirilgan. Hujumlarda ISHIDning yuqori martabali amaldori va qo‘mondoni Usama Jamol Muhammad Ibrohim al Janabiy yo‘q qilingan.
“Uning o‘limi ISHIDning terrorchilik hujumlarini amalga oshirish va uyushtirish qobiliyatiga putur yetkazadi”, — deyilgan AQSH Markaziy qo‘mondonligi xabarida
Hujum oqibatida tinch aholi orasida jabrlanganlar bo‘lmagan. Suriya hukumati rasmiylari ham halok bo‘lganlar va shikastlanganlar haqida maʼlumot tarqatmagan.
AQSH rasmiylari maxsus operatsiya o‘tgan haftada ISHID guruhi Suriya hukumati qo‘shinlari bazasida tashkil etgan teraktga javoban amalga oshirilganini maʼlum qilgan. O‘sha teraktda 16 nafar suriyalik askar va 1 nafar ofitser halok bo‘lgan edi.
“Askarlar minalangan maydonga tushib qolgan va ISHID guruhi aʼzolarining hujumidan keyin halok bo‘lgan”, — deyilgan Suriya rasmiylari tarqatgan xabarda.
Birlashgan Millatlar Tashkilotining yanvar oyida eʼlon qilingan hisobotida aytilishicha, ISHIDning Iroq va Suriyadagi umumiy kuchi 3000 dan 5000 nafargacha jangchini o‘z ichiga oladi. Ushbu harbiy otryadlar asosan Suriyaning Badia cho‘lida joylashgan.
Izoh (0)