Niderlandiya bosh vaziri Mark Ryutte Yens Stoltenbergdan keyin NATOning yangi bosh kotibi bo‘ladi. Bu haqda Niderlandiyaning NOS televideniyesi tarqatgan xabarga asoslanib, Reuters xabar bermoqda.
Manbada aytilishicha, Mark Ryutte Vengriya va Slovakiya tomonidan NATO alyansiga yangi rahbar sifatida qo‘llab-quvvatlangan. Mark Ryutte Kiyevning sodiq ittifoqchisi va Rossiya prezidenti Vladimir Putinning tanqidchisi sifatida shuhrat qozongan.
Vashingtonda AQSH davlat kotibi Entoni Blinken ishtirokida o‘tgan matbuot anjumanida so‘zlagan Yens Stoltenberg yangi bosh kotib haqidagi xabarlarni inkor etmagan. Bu esa OAVda tarqagan xabarlarning tasdig‘i sifatida ko‘rilmoqda.
“Vengriya bosh vaziri Viktor Orbanning bayonoti bilan biz keyingi bosh kotibni tanlash bo‘yicha xulosaga juda yaqin keldik. O‘ylashimcha, bu juda yaxshi yangilik”, — degan NATOning hozirgi bosh kotibi Yens Stoltenberg.
Anjumanda Stoltenberg Ryutte haqida qisqa fikr bildirib, u agar vazifaga tayinlansa, bu eng to‘g‘ri qaror bo‘lishini aytgan. Alyansda Mark Ryutteni tanlash borasida hech qanday qarama-qarshiliklar yo‘qligini ham maʼlum qilgan.
“Menimcha, Mark juda kuchli nomzod. U bosh vazir sifatida katta tajribaga ega. U yaqin do‘st va hamkasb, shuning uchun ham tez orada alyans uning mening o‘rnimga nomzod bo‘lishi haqida qaror qabul qilishiga qattiq ishonaman. Bu barchamiz uchun, NATO va men uchun ham yaxshi bo‘ladi”, — degan NATO bosh kotibi.
Rossiya keng miqyosli bosqinini boshlaganidan beri o‘tgan ikki yil ichida Mark Ryutte Yevropaning Ukrainaga harbiy yordam ko‘rsatayotgan harakatlantiruvchi kuchlaridan biri bo‘lib, Yevropada tinchlikni taʼminlash uchun Rossiya jang maydonida mag‘lubiyatga uchrashi mutlaq zarurligini qayta-qayta taʼkidlab kelgan. Uning so‘nggi rahbarligida Niderlandiya mudofaa xarajatlarini NATO talablari bo‘yicha YIMning 2 foizlik chegarasidan oshirgan. Kiyevga F-16 qiruvchi samolyotlari, artilleriya, dron va o‘q-dorilar yetkazib bergan, shuningdek, o‘z armiyasiga katta sarmoya kiritgan.
NATO qarorlarni konsensus asosida qabul qiladi, shuning uchun har qanday rahbarlikka nomzod barcha 32 ittifoqchining ovoziga muhtoj. Ryutte nomzodiga rasman qarshi bo‘lganlar orasida esa Ruminiya prezidenti Klaus Yoxannis bor. Yoxannis NATOga rahbarlik borasida o‘z nomzodini ilgari surmoqda.
Izoh (0)