Germaniya rasmiylari mamlakatda 22-mart Moskva viloyatidagi Crocus City Hall’da yuz bergan terakt kabi terrorchilik hujumi sodir bo‘lishidan ogohlantirdi. Bu haqda Financial Times xabar berdi.
“Yevropa, shu jumladan, Germaniya, jihodchi tashkilotlar, xususan, ISHID nishonida”, — dedi Germaniya ichki ishlar vaziri Nensi Faeser.
U Afg‘onistonda faoliyat yurituvchi ISHID Xurosoniga ishora qilib, aynan shu bo‘linma Moskvada yuz bergan terakt uchun javobgarlikni o‘z zimmasiga olganini eslatdi.
“Ehtimoliy ssenariy bu yaqinda Moskvada ko‘rganimizga o‘xshash, keng ko‘lamli, muvofiqlashtirilgan hujumdir”, — dedi Germaniya ichki razvedka boshqarmasi boshlig‘i Tomas Xaldenvang va ISHIDning Xuroson bo’limi “eng xavfli guruh” ekanini aytdi.
Ogohlantirish Germaniyaning Yevropa chempionatiga mezbonlik qilishi bilan bir vaqtda e’lon qilindi. Amaldorlar mazkur tadbir jihodchi terrorchilar uchun “jozibali nishon” bo‘lishi mumkinligidan ogohlantirgan. ISHID Xurosonining targ‘ibot bo‘limi yaqinda futbol stadionida avtomat tutgan qurolli shaxs tasvirlangan, “Oxirgi golni uring!” degan yozuv aks etgan rasmi e’lon qilgan.
Hohenheym universiteti tomonidan o‘tkazilgan so‘rovga ko‘ra, odamlarning 20 foizi terror hujumlaridan qo‘rqib, Euro 2024 o‘yinlarining jamoaviy tomoshalaridan chetlanmoqchi.
Haldenvangning so‘zlariga ko‘ra, guruh o‘z tarafdorlarini Yevropadagi “yumshoq nishonlarga” hujum qilishga chaqiruvchi ko‘plab targ‘ibot videolarini joylashtirgan, bu 2015-yilda Parijdagi Bataklan teatri va uning atrofida, keyingi yili esa Bryussel aeroporti va metro tizimida sodir etilgan hujumlarni eslatadi.
“Bu ISHID Xurosoni orzu qiladigan narsadir”, — dedi Germaniya ichki razvedka rahbari.
Mutaxassislar fikricha, 2015-yilda Afg‘onistonda tashkil etilgan ISHID Xurosoni 2021-yilda AQSH Kobuldan qo‘shinlarini olib chiqib ketganidan so‘ng kuchayib, hukmron “Tolibon”ning guruhni yo‘q qilish uchun olib borgan qonli isyonga qarshi kampaniyasiga qaramay, xalqaro faoliyatini kuchaytirgan.
Izoh (0)