Janubiy Koreya prezidenti Yun Sok Yol va rafiqasining O‘zbekistonga uch kunlik tashrifi yakunlandi. Oliy martabali mehmonlarni aeroportda prezident Shavkat Mirziyoyev va rafiqasi kuzatib qo‘ydi. Bu haqda prezident matbuot xizmati xabar berdi.
Uch kunlik tashrif doirasida oliy darajadagi muzokaralar bo‘lib o‘tdi, ular yakunida yetakchilar Alohida strategik sheriklikni yanada chuqurlashtirish va har tomonlama kengaytirish to‘g‘risidagi qo‘shma bayonotni imzoladilar. Ikki tomonlama hujjatlar to‘plami qabul qilindi.
Davlat rahbarlari Koreyaning yetakchi kompaniyalari va bank-moliya institutlari vakillari ishtirokidagi qo‘shma biznes forumida qatnashdi, Toshkentdagi Texnoparkka tashrif buyurib, sanoat kooperatsiyasi uchun mavjud salohiyat bilan tanishdi.
Bugun davlat rahbarlarining muloqoti Samarqandda davom etdi. Prezidentlar rafiqalari bilan birga qadim shaharning tarixiy-meʼmoriy durdonalari bilan tanishdilar.
Tashrif tadbirlari yakunlanganidan so‘ng aeroportda prezident Yun Sok Yol va rafiqasini O‘zbekiston prezidenti Shavkat Mirziyoyev va rafiqasi kuzatib qo‘ydi.
Izoh (0)