Жанубий Корея президенти Юн Сок Ёл ва рафиқасининг Ўзбекистонга уч кунлик ташрифи якунланди. Олий мартабали меҳмонларни аэропортда президент Шавкат Мирзиёев ва рафиқаси кузатиб қўйди. Бу ҳақда президент матбуот хизмати хабар берди.
Уч кунлик ташриф доирасида олий даражадаги музокаралар бўлиб ўтди, улар якунида етакчилар Алоҳида стратегик шерикликни янада чуқурлаштириш ва ҳар томонлама кенгайтириш тўғрисидаги қўшма баёнотни имзоладилар. Икки томонлама ҳужжатлар тўплами қабул қилинди.
Давлат раҳбарлари Кореянинг етакчи компаниялари ва банк-молия институтлари вакиллари иштирокидаги қўшма бизнес форумида қатнашди, Тошкентдаги Технопаркка ташриф буюриб, саноат кооперацияси учун мавжуд салоҳият билан танишди.
Бугун давлат раҳбарларининг мулоқоти Самарқандда давом этди. Президентлар рафиқалари билан бирга қадим шаҳарнинг тарихий-меъморий дурдоналари билан танишдилар.
Ташриф тадбирлари якунланганидан сўнг аэропортда президент Юн Сок Ёл ва рафиқасини Ўзбекистон президенти Шавкат Мирзиёев ва рафиқаси кузатиб қўйди.
Изоҳ (0)