Tailandda noyob egizak fillar dunyoga keldi

Tailandda o‘ta noyob hisoblangan egizak fillar tug‘ilishi hodisasi kuzatildi. Bu haqda BBC nashri xabar berdi.

Manbada aytilishicha, Osiyo fili egizaklarni dunyoga keltirgan. Hodisa haqida xabar topgan zoologlar buni kamyob, hattoki “mo‘jizaviy” voqea deb baholagan.

Egizaklarni 36 yoshli Chamchuri laqabli fil dunyoga keltirgan. Fil bolalari turli jinslarga mansubligi xabar qilingan.

Zoologlarga ko‘ra, fil egizak dunyoga keltirishi yuzdan bir foiz holatdagina yuz berishi mumkin. Turli jinsdagi egizak fillar tug‘ilishi hodisasi esa juda noyob bo‘lib, deyarli kuzatilmagan.

“Biz har doim fil egizaklarini ko‘rishni xohlaganmiz, lekin buni hamma ham ko‘ra olmaydi, chunki bu ko‘p sodir bo‘lmaydi”, — degan ona filning qarovchisi Mipan ismli ayol.

Maʼlumot o‘rnida, aholining asosiy qismi buddaviylar bo‘lgan Tailandda fillar muqaddas hisoblanadi. Ular, shuningdek, mamlakat milliy ramzi hamdir.

Yosh egizak fillarni Ayutthaya fil saroyi va Royal Kraal markazi ijtimoiy tarmoqlarda jonli efirda namoyish etgan. Ushbu voqeadan so‘ng bu “mo‘jiza”ni ko‘rish uchun tashrif buyurishni istovchilar soni nihoyatda ko‘paygan.