Istiqbolli loyihalar milliy agentligi direktorining “Qimmatli qog‘ozlar emissiyasi va emissiyaviy qimmatli qog‘ozlar chiqarilishlarini davlat ro‘yxatidan o‘tkazish qoidalariga o‘zgartirish va qo‘shimchalar qiritish to‘g‘risida”gi buyrug‘i qabul qilindi.
Qimmatli qog‘ozlar emissiyasi va emissiyaviy qimmatli qog‘ozlar chiqarilishlarini davlat ro‘yxatidan o‘tkazish qoidalariga kiritilayotgan qo‘shimchalarga muvofiq:
- yashil iqtisodiyotni rivojlantirishga qaratilgan loyihalar uchun korporativ obligatsiyalarni chiqarishga yo‘l qo‘yiladi;
- yashil korporativ obligatsiyalarni chiqarish va muomalasi bo‘yicha uslubiy qo‘llanma Istiqbolli loyihalar milliy agentligi tomonidan tasdiqlanadi.
Yashil korporativ obligatsiyalarni chiqarish uchun qo‘shimcha ravishda quyidagilar taqdim etiladi:
- Xalqaro kapital bozorlari assotsiatsiyasi (ICMA) tomonidan vakolat berilgan yoki Iqlim obligatsiyalari tashabbusi (CBI) tomonidan tasdiqlangan yoxud Yevropa qimmatli qog‘ozlar va bozorlar boshqarmasi (ESMA) tomonidan ro‘yxatdan o‘tgan ixtisoslashtirilgan tashkilotlardan asos dasturi bo‘yicha yashil standartlarga muvofiqlik sertifikatini olganlik to‘g‘risidagi xulosa nusxasi, shuningdek yashil obligatsiyalarni chiqarish uchun asos dasturi;
- korporativ obligatsiyalarni joylashtirishdan tushgan mablag‘lardan foydalanish maqsadi va ularning O‘zbekiston Milliy “yashil” taksonomiyasi va/yoki boshqa ekvivalent taksonomiyalar talablariga muvofiqligi bo‘yicha emitent rahbari va bosh buxgalterining imzolari bilan tasdiqlangan maʼlumotnoma.
Shuningdek, obligatsiya chiqarish to‘g‘risidagi qaror va emissiya risolasida:
- obligatsiyalarni joylashtirishdan tushgan mablag‘larni Milliy yashil taksonomiya va/yoki boshqa ekvivalent taksonomiyalar talablariga muvofiq ishlatish maqsadi to‘g‘risida maʼlumot;
- Milliy yashil taksonomiya va/yoki boshqa ekvivalent taksonomiyalar talablari doirasida erishiladigan rejalashtirilgan natijalar (KPI) to‘g‘risida maʼlumot;
- Yashil standartlarga muvofiqlik sertifikatining mavjudligi, shuningdek, bunday sertifikatni bergan tashkilot to‘g‘risidagi maʼlumotlar aks ettirilishi lozim.
Hujjat Qonun hujjatlari maʼlumotlari milliy bazasida davlat tilida eʼlon qilingan va 2024-yil 10-iyundan kuchga kirdi.
- Eslatib o‘tamiz, 2023-yil oktyabr boshlarida O‘zbekiston ilk bor 4,25 trln so‘m miqdoridagi yashil suveren xalqaro obligatsiyalar hamda 660 mln dollar miqdoridagi xalqaro obligatsiyalarni London fond birjasida joylashtirgandi.
- So‘mda chiqarilgan suveren xalqaro obligatsiyalar MDH davlatlari ichida ilk “yashil” suveren obligatsiyalar hisoblanadi.
Izoh (0)