Isroil harbiy vazirlar mahkamasi aʼzosi Benni Gants bosh vazir Binyamin Netanyaxuning harbiy kabinetini tark etishini e’lon qildi. Bu haqda Deustche Welle xabar berdi.
Benni Gants G‘azo sektorining urushdan keyingi kelajagi borasida Netanyaxu bilan kelishmovchiliklar tufayli shunday qaror qilgan. U tegishli qarorni “kuchli og‘riq bilan qabul qilgan”ini aytgan.
Afsuski, janob Netanyaxu haqiqiy g‘alabaga erishishimizga to‘sqinlik qilmoqda, — dedi u.
Siyosatchi Netanyaxuni shaxsiy siyosiy manfaatlarini G‘azo sektorida urushdan keyingi strategiyani ishlab chiqishdan ustun qo‘yganlikda aybladi. Gants o‘z nutqini Isroil bosh vazirini navbatdagi umumiy saylovlar sanasini belgilashga chaqirish bilan yakunladi.
Benni, hozir kampaniyadan chiqish vaqti emas, kuchlarni birlashtirish vaqti, — deya munosabat bildirdi Isroil bosh vaziri .
Gants nafaqat o‘zi, balki harbiy vazirlar mahkamasida besh o‘rinni egallagan “Milliy birdamlik” partiyasining qolgan a’zolari ham hukumatni tark etayotganini ta’kidladi.
May oyi o‘rtalarida Benni Gants Isroil bosh vaziriga ultimatum qo‘yib, agar u 8-iyungacha G‘azo sektorida urushdan keyingi vaziyatni tartibga solish rejasini taqdim qilmasa, iste’foga chiqishini aytgandi. Gantsning fikricha, reja oltita strategik maqsadni o‘z ichiga olishi kerak, jumladan, garovga olinganlarni ozod qilish, HAMASni ag‘darish, G‘azo sektorini demilitarizatsiya qilish va uni nazorat qilish, AQSH, Yevropa Ittifoqi, arab davlatlari va falastinliklar ishtirokida anklavning “fuqarolik boshqaruvining xalqaro mexanizmi”ni yaratish.
Izoh (0)