“Xitoy Markaziy Osiyoga manfaatli koridorni erta yakunlash uchun mintaqa davlatlari bilan faol hamkorlik qiladi” — Si Szinpin”

Xitoy hukumati Markaziy Osiyo mamlakatlariga manfaat olib keladigan strategik koridorni tez fursatda yakunlash ustida faol ish olib bormoqda. Bu haqda Xitoy rahbari Si Szinpin bayonotiga asoslanib, China Daily nashri xabar berdi.

Si Szinpin 6-iyun kuni Xitoy—Qirg‘iziston—O‘zbekiston temiryo‘li loyihasi bo‘yicha hukumatlararo bitim imzolangani munosabati bilan Markaziy Osiyo rahbarlariga tabrik yo‘llagan edi. U, shuningdek, Xitoy Markaziy Osiyo davlatlari bilan strategik koridorni erta muddatda yakunlash uchun uch davlat manfaati yo‘lida ishlashga sodiq ekanini bildirgan.

Xitoy rahbari Si Szinpin Pekinda uch tomonlama hukumatlararo bitim imzolanganini rasman maʼlum qilgan. Si Szinpin, Qirg‘iziston prezidenti Sadir Japarov va O‘zbekiston prezidenti Shavkat Mirziyoyev videoaloqa orqali bir-birlariga muhim kelishuvga erishilgani yuzasiga tabrik izhor qilishgan.

Xitoy rahbarining taʼkidlashicha, Xitoy—Qirg‘iziston—O‘zbekiston temiryo‘li Xitoyning Markaziy Osiyo bilan bog‘lanishi uchun strategik loyiha bo‘lib, bu uch davlatning “Bir makon, bir yo‘l” tashabbusi doirasidagi hamkorlik saʼy-harakatlarini ifodalaydi.

Si Szinpin hukumatlararo bitimning imzolanishi temiryo‘l loyihasini amalga oshirish uchun mustahkam huquqiy asos yaratishini aytgan. Shuningdek, kelishuv temiryo‘l loyihasining tasavvurdan aniq voqelikka o‘tganidan dalolat beradi, uch davlatning ushbu yo‘nalishdagi qatʼiy qarorini ko‘rsatadi.

“Xitoy Qirg‘iziston va O‘zbekiston bilan hamkorlikdagi loyihani boshlash uchun zarur tayyorgarlik ko‘rish, uch mamlakat va ularning xalqi manfaati uchun strategik yo‘lakni tugatishni tezlashtirish hamda mintaqaviy iqtisodiy va ijtimoiy rivojlanishga ko‘maklashish yo‘lida qatʼiy davom etadi”, — degan Xitoy rahbari Markaziy Osiyo rahbarlari bilan videoaloqadan so‘ng matbuot uchun eʼlon qilgan nutqida.

Xitoy—Qirg‘iziston—O‘zbekiston temiryo‘li Shinjon-Uyg‘ur avtonom viloyatidagi Qashg‘ar shahridan boshlanishi xabar qilingan. Qirg‘iziston hududi orqali o‘tib, O‘zbekistonga kiradigan koridorning umumiy uzunligi, rejaga ko‘ra, 523 kilometrni tashkil etadi. Uning 213 kilometr hududi Xitoy hududidan o‘tadi.

Kelajakda ushbu temiryo‘l orqali G‘arbiy va Janubiy Osiyoga chiqish imkoniyatlari haqida ham so‘z borgan. Qurilish tugallangandan so‘ng loyiha mintaqadagi iqtisodiy va ijtimoiy rivojlanishni tezlashtirib, uch mamlakat o‘rtasidagi aloqani sezilarli darajada oshirishi kutilmoqda.

“Temiryo‘l mintaqa davlatlari va Xitoy o‘rtasidagi hamkorlikni osonlashtirishga yordam beradi va barcha unda ishtirok etayotgan mamlakatlarning uzoq muddatli manfaatlariga mos keladigan do‘stlik aloqalarini chuqurlashtiradi”, — degan Si Szinpin.