Хитой ҳукумати Марказий Осиё мамлакатларига манфаат олиб келадиган стратегик коридорни тез фурсатда якунлаш устида фаол иш олиб бормоқда. Бу ҳақда Хитой раҳбари Си Цзиньпин баёнотига асосланиб, China Daily нашри хабар берди.
Си Цзиньпин 6 июнь куни Хитой—Қирғизистон—Ўзбекистон темирйўли лойиҳаси бўйича ҳукуматлараро битим имзолангани муносабати билан Марказий Осиё раҳбарларига табрик йўллаган эди. У, шунингдек, Хитой Марказий Осиё давлатлари билан стратегик коридорни эрта муддатда якунлаш учун уч давлат манфаати йўлида ишлашга содиқ эканини билдирган.
Хитой раҳбари Си Цзиньпин Пекинда уч томонлама ҳукуматлараро битим имзоланганини расман маълум қилган. Си Цзиньпин, Қирғизистон президенти Садир Жапаров ва Ўзбекистон президенти Шавкат Мирзиёев видеоалоқа орқали бир-бирларига муҳим келишувга эришилгани юзасига табрик изҳор қилишган.
Хитой раҳбарининг таъкидлашича, Хитой—Қирғизистон—Ўзбекистон темирйўли Хитойнинг Марказий Осиё билан боғланиши учун стратегик лойиҳа бўлиб, бу уч давлатнинг “Бир макон, бир йўл” ташаббуси доирасидаги ҳамкорлик саъй-ҳаракатларини ифодалайди.
Си Цзиньпин ҳукуматлараро битимнинг имзоланиши темирйўл лойиҳасини амалга ошириш учун мустаҳкам ҳуқуқий асос яратишини айтган. Шунингдек, келишув темирйўл лойиҳасининг тасаввурдан аниқ воқеликка ўтганидан далолат беради, уч давлатнинг ушбу йўналишдаги қатъий қарорини кўрсатади.
“Хитой Қирғизистон ва Ўзбекистон билан ҳамкорликдаги лойиҳани бошлаш учун зарур тайёргарлик кўриш, уч мамлакат ва уларнинг халқи манфаати учун стратегик йўлакни тугатишни тезлаштириш ҳамда минтақавий иқтисодий ва ижтимоий ривожланишга кўмаклашиш йўлида қатъий давом этади”, — деган Хитой раҳбари Марказий Осиё раҳбарлари билан видеоалоқадан сўнг матбуот учун эълон қилган нутқида.
Хитой—Қирғизистон—Ўзбекистон темирйўли Шинжон-Уйғур автоном вилоятидаги Қашғар шаҳридан бошланиши хабар қилинган. Қирғизистон ҳудуди орқали ўтиб, Ўзбекистонга кирадиган коридорнинг умумий узунлиги, режага кўра, 523 километрни ташкил этади. Унинг 213 километр ҳудуди Хитой ҳудудидан ўтади.
Келажакда ушбу темирйўл орқали Ғарбий ва Жанубий Осиёга чиқиш имкониятлари ҳақида ҳам сўз борган. Қурилиш тугаллангандан сўнг лойиҳа минтақадаги иқтисодий ва ижтимоий ривожланишни тезлаштириб, уч мамлакат ўртасидаги алоқани сезиларли даражада ошириши кутилмоқда.
“Темирйўл минтақа давлатлари ва Хитой ўртасидаги ҳамкорликни осонлаштиришга ёрдам беради ва барча унда иштирок этаётган мамлакатларнинг узоқ муддатли манфаатларига мос келадиган дўстлик алоқаларини чуқурлаштиради”, — деган Си Цзиньпин.
Изоҳ (0)