“O‘zbekgidroenergo” AJ boshqaruvi raisi Abdug‘ani Sanginov prezident Shavkat Mirziyoyevning Turkiyaga safari davomida Anqarada bo‘lib, Dolsar Engineering kompaniyasi bosh ofisida kompaniya raisi Irfan Aker bilan muloqot qildi. Bu haqda “Daryo”ga “O‘zbekgidroenergo” AJ axborot xizmati rahbari Ravshan Boyqulov xabar berdi.
Ta’kidlanishicha, gidroenergetika sohasida Turkiya kompaniyalari bilan hamkorlik aloqalari mustahkamlanmoqda.
Uchrashuvda O‘zbekiston va Turkiya o‘rtasidagi hamkorlik aloqalari yil sayin mustahkamlanib borayotgani, ikki davlat munosabatlari yangi bosqichga ko‘tarilib, strategik sheriklik darajasiga olib chiqilgani e’tirof etildi. Turkiya poytaxti Anqara shahrida joylashgan Dolsar Engineering kompaniyasi bosh ofisida “O‘zbekgidroenergo” AJ boshqaruvi raisi bilan ikki tomonlama hamkorlikka qaratilgan uchrashuv tashkil etildi. Kompaniya boshqaruvi raisi Irfan Aker tomonidan tashkil etilgan samimiy qabulda ikki tomonlama hamkorlik aloqalarini mustahkamlash, sohada kompaniya tajribasini ishga solish, mamlakatimiz gidroenergetikasini yanada rivojlantirishga tegishli yo‘nalishlarda hissa qo‘shish borasida fikr bildirildi, — deydi bu haqda xabar bergan mas’ullar.
Bildirilishicha, O‘zbekiston—Turkiya biznes forumida imzolanishi rejalashtirilgan umumiy qiymati 52 million dollarga teng 3 ta loyiha doirasidagi shartnomalar ko‘rib chiqilgan.
Kelishuvlarga ko‘ra, Toshkent viloyatining Bo‘stonliq tumani Pskom daryosida shartnoma qiymati 5,8 million dollar bo‘lgan Toldiqsoy GES va Qorong‘ito‘qay GES, Namangan viloyatining Norin daryosida qiymati 15,7 million dollar bo‘lgan Norin GESlar kaskadi qurilishi rejalashtirilgan. Qiymati 30,5 million dollar bo‘lgan Pskom GESi to‘g‘oni qurilishiga kelishilmoqda, — deydi tashkilot axborot xizmati mas’uli.
Qo‘shimcha qilinishicha, Abdug‘ani Sanginov Anqara shahrida O‘zaltin Holding kompaniyasi bosh direktori Muzeffer O‘zdemir bilan ham muloqot qilgan. Kompaniya direktori kompaniyaning to‘g‘onlar qurish bo‘yicha katta tajribasidan kelib chiqib, Pskom GES qurilishi loyihasi doirasidagi GES to‘g‘oni qurilishida tender orqali ishtirok etish istagini bildirgan.
Izoh (0)