“Ўзбекгидроэнерго” АЖ бошқаруви раиси Абдуғани Сангинов президент Шавкат Мирзиёевнинг Туркияга сафари давомида Анқарада бўлиб, Dolsar Engineering компанияси бош офисида компания раиси Ирфан Акер билан мулоқот қилди. Бу ҳақда “Дарё”га “Ўзбекгидроэнерго” АЖ ахборот хизмати раҳбари Равшан Бойқулов хабар берди.
Таъкидланишича, гидроэнергетика соҳасида Туркия компаниялари билан ҳамкорлик алоқалари мустаҳкамланмоқда.
Учрашувда Ўзбекистон ва Туркия ўртасидаги ҳамкорлик алоқалари йил сайин мустаҳкамланиб бораётгани, икки давлат муносабатлари янги босқичга кўтарилиб, стратегик шериклик даражасига олиб чиқилгани эътироф этилди. Туркия пойтахти Анқара шаҳрида жойлашган Dolsar Engineering компанияси бош офисида “Ўзбекгидроэнерго” бошқаруви раиси билан икки томонлама ҳамкорликка қаратилган учрашув ташкил этилди. Компания бошқаруви раиси Ирфан Акер томонидан ташкил этилган самимий қабулда икки томонлама ҳамкорлик алоқаларини мустаҳкамлаш, соҳада компания тажрибасини ишга солиш, мамлакатимиз гидроэнергетикасини янада ривожлантиришга тегишли йўналишларда ҳисса қўшиш борасида фикр билдирилди, — дейди бу ҳақда хабар берган масъуллар.
Билдирилишича, Ўзбекистон—Туркия бизнес форумида имзоланиши режалаштирилган умумий қиймати 52 миллион долларга тенг 3 та лойиҳа доирасидаги шартномалар кўриб чиқилган.
Келишувларга кўра, Тошкент вилоятининг Бўстонлиқ тумани Пском дарёсида шартнома қиймати 5,8 миллион доллар бўлган Толдиқсой ГЭС ва Қоронғитўқай ГЭС, Наманган вилоятининг Норин дарёсида қиймати 15,7 миллион доллар бўлган Норин ГЭСлар каскади қурилиши режалаштирилган. Қиймати 30,5 миллион доллар бўлган Пском ГЭСи тўғони қурилишига келишилмоқда, — дейди ташкилот ахборот хизмати масъули.
Қўшимча қилинишича, Абдуғани Сангинов Анқара шаҳрида Ўзалтин Ҳолдинг компанияси бош директори Музеффер Ўздемир билан ҳам мулоқот қилган. Компания директори компаниянинг тўғонлар қуриш бўйича катта тажрибасидан келиб чиқиб, Пском ГЭС қурилиши лойиҳаси доирасидаги ГЭС тўғони қурилишида тендер орқали иштирок этиш истагини билдирган.
Изоҳ (0)