Samarqand viloyati Qo‘shrabot tumanida yashash xonadonida marixuana saqlab kelgan shaxs qo‘lga olindi. Bu haqda viloyat IIB axborot xizmati xabar berdi.
Qayd etilishicha, 10-may kuni Qo‘shrabot tumani IIB Tezkor-qidiruv xizmati hamda DXXning tuman bo‘limi xodimlari hamkorligida tezkor tadbir o‘tkazilgan. Tadbir davomida tumanning “Qo‘rg‘on” mahallasida istiqomat qiluvchi 49 yoshli fuqaro yashash xonadonida alohida paketlarga qadoqlangan o‘tkir hidli, yashil rangli, quruq holdagi sof og‘irligi 10 kilomgramm 95 gramm modda saqlab kelayotgani aniqlangan.
Viloyat IIB ekspert-kriminalistika markazi xulosasiga ko‘ra, mazkur modda marixuana ekani tasdiqlangan.
Hozirda Qo‘shrabot tumani IIB tergov bo‘linmasi tomonidan tergov harakatlari olib borilmoqda.
Avvalroq Farg‘onada 17 yoshli bola yashayotgan uydan 30 kilodan ortiq narkotik moddalar topilgani to‘g‘risida xabar berilgandi. Shuningdek, Samarqandda fuqaroning uyidan salkam 32 kilo marixuana topilgan, Qirg‘izistonda O‘zbekistonga giyohvand moddalar tashish bilan shug‘ullangan shaxs qo‘lga olingan edi.
Izoh (0)